На 15 ФАД „Стоби“ казахстанскиот ансамбл фаворит
Претставата „Тројанки“ на Драмски театар од Западен Казахстан ја доби Гран При наградата на петнаесетиот Фестивал на античка драма „Стоби“. Режисерот на претставата Куандик Касимов е добитник на наградата за најдобра режија и актерката Бибигул Исалиева, која во претставата „Тројанки“ го игра ликот на Хекуба е добитник на наградата за најдобра женска улога.
На годинешното фестивалско издание единствено наградата за најдобра машка улога заврши кај македонски актер поточно во рацете на Дамјан Цветановски кој ја толкуваше улогата на Хад во претставата „Жени во подземјето“. Одлуката ја донесе фестивалската жири комисија во состав: Катерина Коцевска – претседател и членовите: Атила Клинче и Дејан Дамјановски.
На спуштањето на фестивалската завеса, во салата на велешки театар „Џинот“, не присуствуваа наградените актери и режисер од Казахстан. Ним наградите ќе им бидат испратени. Но во нивна и во чест на Дамјан Цветановски беше изведена премиерата на претставата ,, Тесната лесната и бесната,, од Дејан Дамјановски, работена по текстови на македонски еротски приказни, запишани од Цепенков.
И годинава единствениот фестивал на античка драма во Македонија, наместо во археолошкиот локалитет „Стоби“, се одржа во зградата на велешки театар „Џинот“. Причина е реконструкцијата на амфитеатарот во локалитетот./У.Ј