100 дена работа на градоначалникот Митко Јанчев
Градоначалникот на Кавадарци, Митко Јанчев, денеска даде отчет пред граѓаните за сработеното во првите сто дена од мандатот. Се осврна на сите реализирани проекти и значајни средби со амбасадори на странски држави во Македонија. Јанчев нагласи дека градоначалничката функција носи голема одговорност и бара многу труд, вложување, упорност и работа.
„ Градоначалникот е избор на народот. Вие, драги мои сограѓани, мене ми ја дадовте довербата да ја извршувам оваа функција. Влегов со големи амбиции и уште поголем предизвик да ја оправдам дадената доверба и да Ви докажам дека вашиот избор e правилен. Изминаа 100 дена откако сум на оваа функција. Напорно работевме, се обидувавме за секој проблем да најдеме решение. Некои проблеми брзо се решаваат но има и такви за кои е потребно малку повеќе време и трпеније. Реков дека ќе сторам се за Кавадарци да стане убаво место за живеење, ќе сторам се за Кавадарци да биде на прво место. Можеби ќе звучи нескромно но мислам дека сме на добар пат“ рече Јанчев.
Тој нагласи дека уште првиот ден по превземањето на функцијата, иако бил не работен ден започнало чистењето на фасадата на општинската зграда која беше обоена од „Шарената револуција“.
„Од првиот работен ден , па се до денес редовно се чистат сите улици во Општина Кавадарци. На мое огромно задоволство во чистењето на нашиот град се вклучија и приватни фирми од нашата општина кои своите машини ги ставија во функција на општината и со тоа донираа за почисто Кавадарци. ЈА- МИ во соработка со ЈП Комуналец го чистеше кејот на реката Луда мара како и патот Кавадарци – Дреново ископувајќи канавки и чистење на сливниците. ЈП Комуналец има за обврска напорно да работи во интерес на граѓаните. Возниот парк е збогатен со две нови возила, едно товарно и едно теренско во вредност од 83000 евра. По теркот на големите европски градови, благодарение на Синалко –Германија, Кожувчанка и ИГМ, ЈП Комуналец доби донација од 3 метларки во вредност од 85000 евра, со тоа Кавадарци се вброи меѓу првите градови во Македонија кои поседуваат вакви метларки“ рече градоначалникот.
Јанчев информира дека во централното градско подрачје старите канделабри беа заменети со нови. Плоштадот повторно го доби часовникот кој е дониран од Скопска пивара но неколку години не беше поставен на Градскиот плоштад. Жардинериите во центарот на градот почнаа да се уредуваат.
„На неполн месец од извршувањето на мојата функција започна проектот “Мој Општинар“. Овој проект е прв ваков во Република Македонија. Општина Кавадарци сега во секој реон има свој општинар кој навремено ги решава проблемите со кои се соочуваат граѓаните. Целата опрема за овој проект е донација од: Кожувчанка, ЈА-МИ, Екстра Бус, Велком Трејд, Метал Апостолов и Павер Трејд. “Мој општинар“ започна акција “За чисто и убаво Кавадарци“. Неколку фирми помагнаа во реализирање на оваа акција и ги ставија во функција своите машини за доброто на Општина Кавадарци. АНЕЛМАК, АС МАШИНИ, ЈА-МИ, ВСГД и ТРАСЕР во соработка со ЈП Комуналец и “Мој општинар“ неколку денови чистеа на повеќе локации во Кавадарци. ИГМ донираше 600 метални столбови, дел од нив веќе се поставени на неколку локации во Кавадарци. Приоритет беше тротоарот во центарот на градот кој со металните столбови повторно го ставивме во функција на пешаците“ нагласи првиот човек на Кавадарци.
Во првите сто дена се работело под еденакво како во градот, така и во селата. Реализирани се многу проекти за реконструкција и изградба на улици, а шеталиштето на кејот на реката Луда Мара влезе во третата фаза од изградбата.
„Поставен е пешачки мост над улицата Шишка во правец исток-запад веднаш над Основниот суд Кавадарци. Намената му е исклучиво за пешаци. Овој мост пред се ќе им помогне на учениците безбедно да ја поминуваат оваа улица. Започната е и реконструкција на мостот кај Слога. Се продолжи колекторот кај Глишиќ а се отпочна изградба на атмосферска канализација на ул. Методија Џунов Џикот спој со ул.Калница“ рече Јанчев.
Градоначалникот ја нагласи отпочнатата реконструкција на зградата на противпожарната единица, зграда која е изградена во 1945 година. Се најави и доопремување со современа опрема и нови возила.
Јанчев се осврна и на проектите реализирани за побезбеден сообраќај.
„Раскрсницата на ул.“Никола Минчев“ и Булевар “Македонија„ доби семафори, со тоа сообраќајот во овој дел на градот станува побезбеден. Поставени се и средства за смирување на сообраќајот. Станува збор за поставување на конусни пластични пречки на коловозните ленти од неколку градски улици. Тие имаат за цел да го спречат брзото и непрописно возење“ додаде градоначалникот.
Со 30 отсто од вредноста, општина Кавадарци ќе го подржува поставувањето на термо изолациони фасади на зградите за колективно домување, како дел од мерките за енергетска ефикасност.
Ззапочната е имплементација на проектот за активно потполнување на времето со квалитетни содржини на децата со аутизам. Организирани се спортски активности и часови по музичко.
„Општина Кавадарци потпиша неколку меморандуми и договори за соработка кои се од големо значење за нашата општина. Потпишан е Меморандум за соработка помеѓу Општина Кавадарци и Универзитетот “Гоце Делчев“. Универзитет ќе донира 3 мерни станици за воздух од кои едната е веќе поставена во центарот на градот. Потпишан Меморандум за соработка со Архитектонски факултет. Студентите на Архитектонскиот факултет со свои проекти ќе даваат нов лик на Кавадарци. Нивните предлози и идеи ќе бидат дел од идното уредување на градот“ рапортираше Јанчев.
Општина Кавадарци заедно со ЈП Комуналец, нагласи Јанчев, благодарение на досегашната успешност, доби грант од 2,5 милиони евра. Средства кои се од огромно значење за Општина Кавадарци.
“Како резултат на транспарентното работење на Општина Кавадарци беа организирани јавни дебати и расправи. На моја иницијатива беше организирана трибина за лозаропрозиводителите која беше масовно посетена и на која беа донесени заклучоци кои беа доставени до Влада на Република Македонија и од кои лозаропрозиводителите нема да прават отстапувања.Беше презентирана програмата за поддршка на НВО секторот. Ќе ја интезивираме и зајакниме соработката со граѓанските организации“ рече градоначалникот.
Се осврна и на посета на Амбасадорот на Унгарија Ласло Иштван Дукс, и како што нагласи значајната средба и со Амбасадорот на ЕУ Самуил Жбогар. Зборуваше и за успешно реализирани настани и манифестации.
„Големиот празник св.Трифун, празникот на градот, оваа година беше достоинствено прославен. Со богата културна програма, многу значајни гости и огромна бројка на посетители. Секоја наредна година се надеваме на уште поголем број посетители“ рече Јанчев и додаде дека во холот на општинската зграда се повторно вратени фото-портретите на досегашните први луѓе кои ја воделе општината.
Првиот човек на Кавадарци вети дека во следниот период макотрпно ќе работи за реализирање на сите ветени проекти пред своите сограѓани.
Ангел Данов