Хектар борова шума, синоќа, изгоре на ридот „Љубаш“ во Кавадарци
Пожарникарите од Кавадарци синоќа гаснеле пожар при силни грмотевици, во кој изгорел еден хектар борова шума. Територијалната противпожарна единица, на терен биле од околу 19 часот до еден час по полноќ.
-Пријавата за пожар во подножјето на ридот „Љубаш 2“ ја добивме додека во градот врнеше дожд, па мислевме дека дождовните капки ќе ни помогнат во совладувањето на пламените јазици. Но, на ридот што според кавадарчани, ги претставува белите дробови на градот, имаше само малку роса, па моравме да вложиме повеќе напори за да го совладаме огнот. Ни кажаа дека најверојатно во близина удрил гром, па се претпоставуваше дека тоа е причината за пожарот, рекоа од Противпожарната служба за МИА.
Огнот го гаснеле седум пожарникари со две противпожарни возила. На помош им дошле луѓе и возило од Дирекцијата за заштита и спасување, како и работници со две возила од подружницата на „Македонски шуми” од Кавадарци.