Полициска екипа интервенира во село Бекирлија по барање на Атиџе Муратова таму е и градоначалникот Велковски

11.08.2020

Полициски службеници од Свети Николе во моментов постапуваат по телефонската дојава од 56-годишната Атиџе Муратова која реагирала дека соседот ја вознемирува и се заканува.

Станува збор за познатата жителка на село Бекирлија, во Општина Лозово, која ја одигра главната улога во документарниот филм „Медена земја“.

Oд СВР-Штип соопштија дека откако полициските службеници ќе ја утврдат фактичката состојба меѓу 56-годишната Атиџе Муратова и нејзиниот сосед јавноста ќе биде информирана.

Претходно во Полициската станица во Свети Николе е евидентирана поплака од 56-годишната Муратова и на 7 јуни.

– На 7 јуни во Полициската станица во Свети Николе во 10.20 часот од страна на 56-годишната А. М од селото Бекирлија Општина Лозово, било пријавено дека од страна на 50-годишниот Х. С била вознимирувана, од страна на полициски службеници веднаш е постапено и во 11.30 часот во селото Дорфуилија, Општина Лозово Х. С бил писмено предупреден според прописите, соопшти полицијата.

Градоначалникот на Општина Лозово Ацо Велковски, го посети селото на Атиџе за да и помогне во врска со нарушените меѓучовечки односи со комшијата Хусеин.

„По добиените информации од страна на медиумите за помошта која ја побара Атиџе нашата хероина од Медена земја , а која живее во с.Бекирлија општина Лозово која пријави проблем за нарушени меѓучовечки односи со комшијата Хусеин и дека животот и бил загрозен , веднаш ја побарав на телефон но не беше достапна.Добив информација дека е во село Бекирлија. За да помогнам како Градоначалник, денес лично разговарав со нејзиниот комшија Хусеин со кој имаат нарушени меѓучовечки односи , кој моментално беше во село Дорфулија со кој разговарав да се надмине нивниот проблем кога се заедно во село Бекирлија.

Во разговор со Хусеин најдовме заедничко разбирање си подадовме рака дека заедно ќе ја смириме целата ситуација и за време на викендов заедно ќе одиме кај Атиџе во с.Бекирлија да се помират меѓу себе и да испиеме заедно пријателско кафе и да живеат како добри комшии.Во моментов на нашата хероина Атиџе не и е загрозен животот од страна на Хусеин , ќе се стабилизира ситуацијата и ќе се надмине проблемот со нарушените човечки односи.Исто така добив информација дека кај Хусеин веќе биле службени лица од Полицијата со кој обавиле разговор и се упатиле спрема село Бекирлија кај што моментално престојува Атиџе, напиша Велковски.

Фото: Архива на Дума.мк