Опозицијата обвинува, велешката болница не е реновирана, директорот пак го тврди спротивното

Нема ништо од бомбастично најавената реконструкција на велешката болница пред шест години и инвестицијата од 600 илјади евра. Не се изгради ниту ново физикално одделение што ДПМНЕ го најави пред една година ниту пак се реновираше ентериерот во постојниот објект. Само со пет илјади евра се реновираше дел од кровот. Со ваква реакција денеска излегоа велешките социјалдемократи. Тие обвинија дека болницата месечно издвојува преку триста евра за одржување на лифтови, а таму функционира само лифтот за итните случаи што со посебена чип картичка можат да го активираат исклучиво вработените.

„Ако треба да одите на 5-ти спрат треба да молите некој од вработените да ви го отклучи лифот.Да оној лифт со кој се превезуваат и болни и посетители и се носи храна за пациенти и веш од перална и лекови ама и починатите во болницата. Е,сега на прагот сме на т.н. нова реконструкција која замислите почетно ќе чинеше 18 милиони денари пари заштедени односно скратени од граѓаните .Ама есапот покажа друго слкучениот договор е за 20 милиони и 980 илјади денари.И веднаш се поставува прашањето-Да не е ова Велес 2016 како Скопје 2014 година.Само гипс картон,само шминка а ништо суштинско“, рече Весна Стојанова Богоевска, О.О на СДСМ.

Од СДСМ ги прашуваат граѓаните колку пати биле принудени од дома да носат лекови, чаршави и ќебиња додека престојуваат таму.

„ Ние граѓаните сакаме да останеме здрави, а доколку се разболеме заслужуваме да бидеме згрижени достоинствено, затоа што не можат сите да си го дозволиме стандардот на болничките капацитети во приватните здравствени установи.Не успеваме сите да заштедиме по 100 000 евра годишно. Вашите криминални политики се на штета на граѓаните“, рече Стојанова Богоевска.

На обвинувањата на СДСМ со реакција се јави директорот на болницата д-р Атанас Василев. Тој вели дека велешката болница минатата година била прогласена за една од петте најдобри болници во државата. Василев исто така тврди дека болницата во последните шест години била реновирана и тоа интерното одделение, акушерското, хируршкото, ортопедија, урологија и детското одделение и за тоа билое потрошени еден милион евра.

„Од друга страна комплетно е реновирано физикалното одделение за кое што се вложени пет милиони денари. Освен што е реновирано набавена е и опрема а со тоа е зголемен и бројот на интервенции. Во изминатите шест години велешката болница набави вкупно 61 нови апарати за кои се потрошени еден милион и четиристотини четириесет и три илјади евра и тоа без последните четири апарати што ги добивме во 2016 година“, рече Василев.

Социјалдемократите тврдат дека Груевски и Тодоров ќе одговараат за криминалните политики во здравството што во последните десет години го довелe во катастрофална состојба./Д.С