Коцевски: Ќе бидат Градоначалник на сите граѓани на Општина Велес, без разлика дали гласале или не за мене
Во присуство на претседателот и секретарот на Општинската организација на Социјалдемократскиот сојуз на Македонија во Велес, Панче Иванов и Марјанчо Јорданов, победата на оваа коалицијата на шестите локалните избори, во партискиот штаб ја соопшти кандидатот за Градоначалник Аце Коцевски. Тој прес конференцијата ја започна со тоа што рече дека се победници во општината со разлика од четири илјади гласови предност пред политичките ривали, во првиот изборен круг. Потоа Коцевски упати благодарност до сите сограѓани што му ја дадоа довербата велејќи дека на тој начин направиле исправање на една голема историска неправда направена во претходните изборни циклуси со кражба на неговите гласови како резултат на подмитување, вршење на притисок, уцени, закани и слично.
-Овој пат за среќа тоа не можеа да го направат. Граѓаните го направија вистинскиот избор. Сакам да се заблагодарам на носителот на Листата за советници, на кандидатите за членови на Советот на општина Велес, да се заблагодарам на Социјалдемократскиот сојуз и на сите коалициони партнери за безрезервната поддршка што ми ја даваа во текот на целата изборна кампања, рече Коцевски.
Тој упати порака до граѓаните на Велес во која рече дека изборите беа и поминаа како и дека сега следува период бо кој ќе биде Градоначалник на сите граѓани во општината.
-Јас ќе бидам Градоначалник на сите граѓани на Велес. И на тие што ме гласаа и на тие што не ме гласаа. Нема да правам никаква разлика ни според членувањето во политичките партии, ни според партиска, национална, полова и верска припадност. Мојата единствена желба е Велес повторно да биде најдобра општина во Република Македонија, општина за пример, во која младите ќе сакаат да останат и да ја градат не само својата сегашност туку и својата иднина. Би сакал да кажам дека во Велес, за среќа, не победи концептот на „Новата ера“ туку победи концептот за промени и концептот за заедничи, подобар живот за сите граѓани во Велес и во Република Македонија, рече Коцевски.
Тој ги соопшти неговите првични анализи за освоените мандати за членови на Советот на општина Велес од коалицијата предводена од СДСМ кога рече дека предвидува еден до два мандати повеќе од противничката коалиција.
На новинарското прашање зошто во текот на изборниот ден имаше зголемено присуство на полицијата на левата страна на градот и колку се точни непотврдените информации дека причина за тоа бил обидот за поткуп на гласачи од страна на активисти од спротивниот табор, Коцевски одговори:
– Не би можел со сигурност да тврдам што сакале да прават но во два наврати се забележани нивниот носител на листата со кандидати за членови во Советот и кандидатот за член на Советот, Петре Саздов како се движат во тој дел од градот. Подоцна, околу 18.30 часот и кандидатот за градоначалник Славчо Чадиев кога на претходните изборни циклуси биле затекнати во истата куќа каде што полициските Алфи чуваа стража а внатре се делеа пари, се купуваа гласови на Роми. Овој пат го спречивме тоа, рече Коцевски.
Запрашан дали има вистина дека во изминатите 24 часа, СДСМ помогната од полицијата купувала гласови во Велес и во последните седум дена со помош на голем број на претставници на Владата и МВР ја водела најцрната кампања против кандидатот за Градоначалник Славчо Чадиев, Коцевски одговори:
– Со индигнација ги отфрлам тие лаги и невистини. Тоа не е наш стил на работа. Ние бевме убедени дека ќе победиме и не сакаме да има никаква дамка на нашата победа. Нашето учество на терен беше толкаво, колку да ги спречиме нивните незаконски дејанија и за среќа успеавме во тоа да ги парализираме да купуваат гласови од сиромашните Роми. Во врска со учеството на министрите, во Велес еден ден беше Радмила Шекеринска, еден ден Кочо Анѓушев во градот Велес и еден ден Љупчо Николовски во селото Иванковци. Толку беше присуството. Тие проценија и веруваа во нас, веруваа дека ние ќе победиме и без нивната помош и поддршка, рече Коцевски.
Одговарајќи на новинарско прашање како успеале да го спречат поткупот дали како партија или со помош на МВР, Коцевски одговори дека тој не знае што работело МВР бидејќи нема влијание врз работата на министерството туку дека поради партиски информации од набљудување на теренот дејствувале со партиски активисти и во рамките на дозволеното.
По прес конференцијата тој придружуван од Иванов, од Јорданов, од носителот на листата ненад Коциќ, од кандидати за членови во Советот на Општина Велес и членови на претседателството на партијата се симнаа долу пред зградата во која се наоѓаат партиските простории каде ги чекаа активисти и симпатизери со кои ја прославија победата на изборите. /У.Ј