Коцевски: Велес ќе биде град на среќни и задоволни граѓани
Градоначалникот на Велес Аце Коцевски синоќа на свечената академија со која Општината одбележа 73 години слободен Велес, во обраќањето пред присутните гости како заменик министерот за локална самоуправа Дејан Павлевски, екс Градоначалникот Славчо Чадиев, претставници на бизнис заедницата, на политичките партии, на верските заедници, на АРМ, на граѓанските организации како и пред делегациите на збратимени градови на Велес од Србија, Сомбор, Ужице, и Медијана-Ниш, потоа од Каршијака во Турција и Слобозија во Романија ја соопшти развојната визија на градот за наредните четири години.
– Нашата визија е овде да има место во кое граѓаните ќе бидат во центарот на вниманието со нивните барања, потреби и проблеми. Место на среќни семејства и задоволни граѓани. Општина со максимално искористени креативни потенцијали на секој поединец и организација.Општина во која младите генерации ќе гледаат иднина и убави услови за живеење, рече Коцевски.
Тој не пропушти да направи компарација на нашиот град со останатите во светот и како предности на Велес ги наброја градската културна разноликост, етничките заедници кои во Велес со векови делат едно небо и една земја,што како вековна сплотеност е адут повеќе на патот кон иднината.
Традиционално градот ги додели наградиte на граѓани, граѓански здрженија и институции кои во изминатата година постигнале врвни резултати преку кои го афирмирале Велес дома и надвор од државата.
Годинешни добитници на највисоката општинска награда – наградата за животно дело „Гемиџии“се Академик Катица Ќулафкова, д-р Данчо Марковски, др. Стојан Кулеџиовски.
Академик Катица Ќулавкова наградата ја заслужи поради тоа што таа е родена велешанка што денеска со право ја нарекуваат интелектуалниот образ на Велес. Името на Македонската книжевна теоретичарка, есеист, антологичар, критичар, универзитетски професор, поет и раскажувач, акад. Катица Ќулавкова секој велешанец го кажува со гордост и почит. Добитник е на највисокото државно признание за животно дело „11 Октомври“ во 2014, на меѓународно признание за книжевен опус на Друштвото на писателите на Романија во 2016 година.За редовен член на Македонската академија на науките и уметностите е избрана на 27 мај 2003 година. Импресивната биографија и постигнувањата во филолошката наука, ја прават академик Катица Ќулавкова интелектуален амбасадор на Велес во земјава и во светот. Нејзината дејност е неприкосновен темелник на културниот израз на македонскиот народ, извор на знаење и научна интерпретација, бесценета ризница на македонската култура. За сета научна мисла, за сите дела што ги создаде, за промоцијата на Велес и Македонија помеѓу научниот свет, за нејзиниот огромен придонес за се она што значи македонски јазик и култура, за гордоста што му ја донесе на Велес, Општина Велес на Академик Катица Ќулавкова и го доделува највисокото признание награда за животно дело „Гемиџии“ за 2017 година.
Д-р Данчо Марковски е македонски дипломат. Во дипломатијата има правила и можности. Родениот велешанец, правник, дипломат и автор на дела од областа на дипломатијата д-р Данчо Марковски умееше да ги искористи сите можности што му ги дава неговата благородна мисија за да го промовира и овековечи својот роден Велес во мислите и срцата на пријателските народи. Роден е во Велес во 1956 година. Од 1987 до 2012 година др Марковски се посветува на дипломатските мисии : во Триполи – Либија, Анкара – Турција, каде што ја отвора првата македонска Амбасада во светот, Амбасадата во Стокхолм – Шведска, управата за европски земји, Амбасадата во Пекинг.
Во 2008 година е именуван за вонреден и ополномоштен амбасадор во Република Хрватска на која должност останува до 2012 година.
Во Хрватска одликуван е со орден „Редом Кнеза Бранимира“ за неговите успешно реализирани активности. Благодарение на неговите лични заложби и активно учество во време на неговото работење во македонската амбасада во Загреб, се реализираa четири значајни проекти за Велес и Република Македонија За неговиот несебичен придонес, посветеноста на велешките дејци, македонската историја и култура и нејзината промоција на меѓународен план, Општина Велес на д-р Данчо Марковски му го доделува највисокото признание наградата за животно дело „Гемиџии“ за 2017 година.
Д-р.Стојан во 1977 година го формира Одделението за трансфузиологија и хематологија при Медицинскиот центар во Велес и до 1997 година е негов началник. Доктор *Торица*е организатор на многубројни акции за крводарителство , по што Велес високо котираше како град со најмногу собрани крвни единици според број на жителите, и во времето на поранешна Југославија, но и по осамостојувањето на Република Македонија. Големите луѓе немаат време да ги презентираат и да ги пребројуваат успесите во животот, тие едноставно целосно се посветуваат на својата мисија и така навидум незабележително усреќуваат многу семејства, ја враќаат радоста во безброј животи. А таков живот човечки и професионален вреди да се живее.
За сите спасени животи, за целиот непрегор со кој неуморно бараше нова шанса, за сета професионалност, посветеност, за се што направи за Велес и велешани, Општина Велес на д-р Стојан Кулеџиовски му го доделува највисокото признание Награда за животно дело „Гемиџии“ за 2017 година.
Спомен плакетата на Општина Велес за 2017 година ја добија Команда за обука и доктрини на АРМ, Центар за индивидуална обука Велес , Крзнарската компанија „Димко Митрев“ АД увоз – извоз Велес, Младен Најдовски – Бади, новинарот Петар Печков, Карате клуб „Гладијатор“ Велес и др Милан Цветко Станојковски.
Благодарница за 2017 година добија: д-р Тони Тодоровски, Димче Зафировски, семејството Димови, Организациски одбор на Велешки пливачки маратон и афористичарот Атанас Крлевски.
Пофалница за 2017 година им беа додели на: Здружение за заштита на животните „Гласот на животните“Велес, на Камерен црковен хор „Св. вмч. Пантелејмон“, на Димче Наумовски, на Далибор Шаптев Јефремовиќ и на Благој Маневски.
Свечената седница заврши со настапот на етно групата „Баклава“. Во холот на Театар Џинот беше поставена изложба на стари фотографии од Велес.