Со свечена академија одбележан јубилејот -160 години гимназиско образование во Велес

Во изминатите 16 децении, Велес е првиот интелектуален вруток на македонскиот народ, првата суштествена промисла и првиот чекор кон организираното образование во државата. Градот сега со гордост говори дека во далечната 1857 година ја формираше првата Гимназија и опстана во борбата велешани да се образуваат на мајчин, македонски јазик. Денеска кога институцијата Гимназија Кочо Рацин го одбележува големиот јубилеј токму Балканот а и регионот пошироко ја раскажуваат приказната во која се вели дека токму во Велес, во параклисот „Свети Ѓорги“ учителот Јордан Хаџи Константинов – Џинот почнал да описменува десеттици деца во Велес. Во вакви мигови во целост се поима културната и реформаторската димензија на Велес во историјата на македонскиот народ.

– Токму во вакви мигови сфаќаме дека она што ни се чини вообичаено секојдневие всушност е грандиозна победа над времето и искушенијата со една единствена цел: Македонскиот народ да добие свое образование на мајчин јазик, да биде двигател на сопствениот растеж, да биде слободен во мислата и знаењето што го пренесува на младите генерации. За 160 години, од далечната 1857 година до денес, генерации и генерации велешани се здобија со образование што им овозможи да бидат конкурентни на европската и светската интелектуална сцена. 16 векови овде во Велес се калеа брилијантни умови што и ден денес не восхитуваат.Од Малечкиот параклис „Свети Ѓорги“ до денешната гимназија, илјадници млади души допреле до знаењето, до етичките и моралните стандарди на општеството. Само од ослободувањето во 1945 година до денес 11.077 млади се образуваа во велешката гимназија. Овој простор можеби е мал по мерка, но огромен во историски и глобален контекст, рече на свечената академија Градоначалникот на Велес Аце Коцевски.

Гимназијата им оддолеа на сите искушенија: турското ропство, Илинден, Балканските, двете светски војни и е институција достојна за восхит. Таа со гордост го носи името на велешкиот великан „Кочо Рацин“. И соодветно на тоа големо име средното училиште создаде големи нешта. Беше и сеуште е клучен двигател во развојот на свеста и образованието на македонскиот народ.

Во историскиот незаборав на велешката гимназија се врежани сите интелектуалци што ги задолжија велешани вечно да ги паметат. Тоа се: Јордан Хаџи Константинов – Џинот, Гемиџиите, Господин Господин Гаврил – првиот македонски архиепископ, Димитрија Папрадишки, Коста Солев Рацин, Стефан Гајдов, Живко Фирфов, Ганчо Хаџи Панзов и други.

Синоќа кога во општинската сала „Бели Мугри“ се собраа сите почитувачи на оваа образовна институција, Гимназијата, по обраќањето на директорот Давитков ја прикажа театарската претстава „Многу врева за ништо“ од Вилијам Шекспир.

– Вака одлучивме да го заокружуваме одбележувањето на јубилејот и Денот на училиштето. Иако ќе гледате комедија ние ви порачуваме дека во неа ви говориме за една многу сериозна работа, а тоа е човековата подлост и алчност. Тие понекогаш знаат да го засенат нашиот светоглед и да не ни дозволуваат да ги видиме прекрасните работи како што е љубовта. За среќа сите млади и заљубени момчиња и девојки од оваа весела ренесансна комедија, научија важна лекција. Научија дека љубовта е благотворен извор на кој треба да ја згаснеме нашата животна жед.Дека од тој извор треба да пиеме нежност и благост. Да ја препознаваме вистинската искрена љубов и да не му веруваме секому, особено не на оној кој сака да ни нанесе штета. Ви порачуваме сите да го сторите тоа и да ја пронајдете својата среќа и својот мир. Љубовта на крај да го најде својот пат и да триумфира над се, рече Давитков.

Секако на свеченоста не беше пропуштено да се каже дека списокот на великани, кој биле ученици на велешката гимназија е долг, да се спомне бунтот на велешките гимназијалци против бугарската пропаганда во 1942 година што стигна и до Радио Лондон и до целиот свет.

Од тогаш до денес протече време и многу предизвици. Прашање е колку денешните ученици се свесни за грандиозноста на нивното училиште, за честа што ја имаат да се образуваат во интелектуалниот извор на македонскиот народ.

Сепак според констатацијата на Градоначалникот Коцевски во која беше потенцирано учеството на велешката гимназија во Европските програми за образовна мобилност учениците се надеж дека интелектуална светлина сеуште тлее во училиштето кое создава нови генерации за восхит, како оние на кои годинава им беше доделено најпрестижното општинско признание 9-ти Ноември.

– Од името на граѓаните на Велес од сите етнички заедници им изразувам огромна благодарност на сите просветни работници,ученици, интелектуалци и преродбеници што ја создадоа, што ја заштитија и зачуваа колевката на интелектуалниот растеж и највисоките човечки вредности на македонскиот народ, што направија да се гордееме сите велешани овде и во светот. Нека Ви е честит јубилејот 160 години постоење и работа и нека ве крепат вековите со уште толку мудрост, знаење и достигнувања, посака Коцевски./У.Ј