Со донации ПОУ „Маца Овцарова“ доби сензорна соба за децата со аутизам

На приземјето во Посебното основно училиште „Маца Овчарова“ во Велес од денеска е ставена во функција сензорна соба. Неа ќе ја користат, во моментов, дванаесет деца со аутизам. Нивниот број е варијабилен поточно во одредени учебни години може да изнесува и петнаесет или повеќе ученици. Собата е опремена со сензорни светла, играчки и реквизити како и со темен дел за кој тие понекогаш покажуваат потреба па затоа е избран овој метод само како еден што ќе им го олесни престојот во училиштето и тоа на начин што ќе ги релаксира . Со нив работи магистер по аутизам. Тој ги спроведува посебните методи се со цел да ги адаптира и социјализира.

– Тоа е посебна категорија на дечиња која живее во свој свет. Ним им треба максимално внимание како од родителите така и од наставниците. Тоа од нас секојдневно го добиваат. Колешката применува посебни методи на работа со оваа категорија ученици се со цел тие да се чувствуваат удобно во училиштето. Затоа многу важна, нам на наставниците, ни е соработката со нивните родители . Можам да кажам дека нашето училиште ја има стекнато довербата на родителите. Ние со нивните деца работиме на посебен начин , со посебен пристап и со посебни методи. Програмата не нуди описменување туку применува визуелни и тактички методи поточно со допир или механичко прилагодување. Тие доста добро ги практикуваат механичките вештини бидејќи имаме категорија на деца со полесни наоди. И токму оваа просторија е прилагодена на потребите на дечињата со потешки наоди, рече директорката Ленче Гаданец.

Особено внимание денеска децата покажаа за лулашката во сензорната соба. Но во неа има и други реквизити и играчки што ги донираше Евангелската црква. Донацијата чини 3.000 евра.

– Потребата за сензорна соба ја дознавме од директорката и од наставниците на училиштето како нешто што е навистина многу потребно во работата со децата со аутизам. Благодарение на Бога и на дарежливиот народ успеавме да ги собереме средствата и да ја купиме опремата . Ова е само еден наш проект во градот. Ние, исто така, собираме доброволни прилози и купуваме храна што потоа спакувана во пакети секој месец ја делиме на седум сиромашни семејства што ги добивме откако побаравме помош од Црвен Крст. Тоа е нашиот втор проект во градот. И се надеваме на што поголем број на хумани граѓани како би можеле да помагаме повеќе , рече Филип Иванов пастор на Евангелската црква во Велес.

Преадаптацијата на една училница во училиштето во сензорна соба ја изведе ГП „Изгрев“.

– Треба да бидеме солидарни и да помагаме, особено кога станува збор за лицата со посебни потреби за да го добијат она што им е неопходно потребно. Јас знам дека и државата прави напори но во исто време не може да се реализира се што е потребно. Општествено одговорните фирми треба да донираат колку што можат за да помагаат, рече Љупчо Георгиев.

Сензорната соба во ПОУ „Маца Овчарова“ профункционира денеска кога се одбележува 2 Април, светскиот ден на аутизам./У.Ј