27 велешки фирми ќе градат капацитети за иновативен пристап во развојот на бизнисите
Дваесет и седум велешки фирми се пријавија на повикот за пројавување на интерес за учество во проектот „Иновациски Центар: Компаративна предност за поголема конкурентност“ што во изминатите шест месеци се спроведува во Велес, Куманово и Скопје. Тие се една третина од вкупно 75 селектирани фирми, во трите градови, кои преку обуки и работилници ќе ги градат сопствените капацитети за иновативен пристап во нивните бизниси. Тие ќе добијат ментори кои ќе им помагаат да ги откријат причините што ги успоруваат развојните иновативни компоненти и ќе ги насочат како побрзо да се развиваат.
– Истовремено ќе се организираат настани на кои што сите фирми учесници ќе имаат можност да си ги разменат своите искуства. Оние фирми што не се селектирани а се пријавиле ќе имаат можност да учествуваат во проектот преку настаните за вмрежување додека селектираните 75 фирми ќе добијат бесплатни обуки и менторска помош. Но сите фими ќе се стекнат со право да бидат дел од иновативниот виртуелен хаб на кој што ќе имаат пристап и ќе можат да ги користат услугите кои што ќе се нудат. Тоа се услуги со информации, „e-learning “ , соработки со компании од други региони итн, рече проектниот кординатор Бети Деловска.
Со изградени капацитети фирмите многу полесно ќе можат да аплицираат на повиците за старт ап бизниси и за иновации кои како финансиски помошти ги нудат домашни институции и странски донатори. Затоа со селектираните фирми ќе работат консултанти од кои се очекува да ги утврдат потребите особено во делот на иновативниот пристап за развој на нивните бизниси.
Проектот „Иновациски Центар: Компаративна предност за поголема конкурентност“ го спроведуваат Фондацијата за развој на мали и средни претпријатија Куманово во партнерство со Фондацијата за поддршка на мали и средни претпријатија Велес со финансиска поддршка на Европската Унија./У.Ј