Здравковски: Коцевски е глумец на функција градоначалник !

За Општинскиот Комитет на ВМРО ДПМНЕ трагикомична била ситуацијата на прес конференцијата во Министерството за образование на која присуствуваше градоначалникот на Велес, Аце Коцевски и неговата реакција на зборувањето на албански јазик на министерот за образование и наука Арбер Адеми. Тие се сомневаат во реакцијата на Коцевски која ја толкуваат „како да се нашол затекнат од некоја за него непозната ситуација“.

– Ова очигледно е еден од филмските настапи на градоначалникот во кој глуми загриженост за граѓаните и функционирањето на општината. Глумец на функција градоначалник. Господине Коцевски, вие како една од клучните политички фигури во градот, бевте свесен што носи изгласувањето на законот за употреба на јазиците за кој гласаше и вашиот соработник Панче Иванов. Дури и кога организиравте парадоксални самоуништувачки забави во Младински, затскривајќи се зад евроинтеграциите бевте свесен која е цената што треба да ја плати народот за остварување на вашите хирови. Според нашите информации двојазичноста сте ја ветувале и на вашите посети во Бузалково и Сливник, иако ние како ВМРО-ДПМНЕ укажувавме дека со овој ваш план само ќе се уназади комуникацијата и соработката помеѓу Македонците и Албанците во општината кој живеат во одлична кохезија. Унапредување на односите се прави со инвестиции, отварање на нови работни места, градење на инфраструктура а не со непромислени потези кој дополнително ќе иницираат нови проблеми во и така поларизираното општество. Сте ветувале господине Коцевски – сега нема причина за лутење и глумење, посебно не од некој совесен и пресметлив човек како што сте вие, рече во денешната изјава за медиумите претседателот на ОК на ВМРО ДПМНЕ Игор Здравковски.

Тој смета дека вистината била сосема друга поточно предизвикана од реакцијата на граѓаните кои му го завртеле грбот.

– Народот ви го сврти грбот. Тонете во жива песок со вашите погубни политики што впрочем се виде и на референдумот на кој имавте поддршка од едвај 27% од гласачите во Велес или во бројки – намалување за цели 3500 гласови за една година, па сега се грепчите за да докачите некоја сламка за спас за враќање на угледот и достоинството кој за воља на вистината ви беа на завидно ниво пред година и половина, додаде Здравковски.

Првиот опозиционер во Велес велејќи дека ВМРО-ДПМНЕ била општествено одговорна партија му предложи помош на Коцевски, во насока на неговото штедење и секако почитување на законите, преку испраќање на македонско-албански речник за да му послужел во понатамошната комуникација. Така, со учење на албански јазик, сметаат од ВМРО ДПМНЕ дека градоначалникот на Велес ќе ги избегнел најавените казни од 5000 $ за неговорење на официјалниот јазик на државата./У.Ј