Велешани учествуваат во креирањето на деценискиот плански развој на градот

Предложените сообраќајни решенија, реконструкцијата на мостот кај Башино село, изградбата на нов што ќе ги поврзува населбата Речани со Велес кај бараките на ЈП „Лисиче“ и преместувањето на автобуската на локација веднаш под железничката станица кои меѓусебно се планирани да бидат поврзани со подземен тунел беа први што ги поддржаа граѓаните на јавната расправа што се одржа, синоќа на 2 април, во големата сала на Општина Велес.

Дискутирајќи по Нацрт Стратегијата за развој на Велес – Паметен град 2019 – 2030 година и по Акцискиот план за реализација учесниците на расправата добија листа со 61 приоритетен проект со цел тие преку бодување да изберат што прво треба да се реализира со цел да се подигне квалитетот на живот на Велешани.

-За мене приоритет е сообраќајното решение во централното градско подрачје. Единствено сметам дека треба да се исфрли подземната гаража на паркингот кај зградата на Основен суд затоа што согласно техничките нормативи подземните и катни гаражи во централните градски јадра охрабруваат или поттикнуваат сообраќај. Главна цел на новото прелог сообраќајно решение треба да биде демотивација на граѓаните да доаѓаат со приватни возила и се согласувам со понуденото решение во кое приоритет треба да им се даде на пешаците, на велосипедистите и на крај на возилата. Затоа моето предлог решение гласи „ Parking goо“ со тоа што катни гаражи сметам дека треба да се постават од спротивната страна на брегот на река Вардар, во билизина на кафеаната „Пармак“, покрај Мало Мовче, пред Биро за вработување и од спротивната страна на градот кај гимназија, Ликовен салон. И ако се премалку тогаш постојат мобилно монтажни и демонтажни катни платформи кои можат да обезбедат дополнителен број на паркинг места, рече Влатко Саздов.

Тој додаде дека комплетно ја поддржува идејата улицата „8 Септември“ да биде пешачка зона со тоа што смета дека во работните денови да се одреди временски период за дотур на стока во продавниците и за движењето на такси возилата.

Сопственикот на фирмата „Хемија комерц“, Трајче Трајков побара пред да се одредат приоритетите од понудената листа со 61 прелози стручен тим на општината да направи ранг листа на инвестициите според приоритети.

-Во науката точно се знае која инвестиција точно дава најдобри показатели. На предложената листа има многу проектни идеи кои чинат цело богатство. Затоа предлагам многу трезвено и студиозно треба да се пристапи на одредувањето на приоритетите на инвестициите. Вработените во аднинистрацијата мора да ни укажат кои проекти колку чинат и на следниот состанок да можеме да ги разгледаме и анализираме како и добра проценка на приоритети да направиме, рече Трајков.

Како 62 предлог проект, на предложената листа, влезе и проектот за доградба на цевководот кој треба да донесе вода од Брана „ Лисиче“ до „Езеро Младост“ со цел за полевање на земјоделските површини во велешко. Тој чини 28,5 милиони евра ,обезбедени пари од КФ банка со кои владата би изградила нов цевковод од брана Лисиче до филтер станица на ЈКП „Дервен“ а постоечкиот да биде резервен. И во заеднички канал да бидат поставени цевките кои би ја носеле водата за пиење до филтерна станица и за наводнување до езеро Младост.

На јавната расправа преку која всушност беа изнесени предлози за десетгодишниот плански развој на Велес, генералниот менаџер на „Макркард – Македонија“ Артур нив ги оцени како мошне добри со единствена забелешка да се внимава на редоследот на нивната реализација.

-Треба да се запази правилниот распоред за да не се прават два пати бидејќи тоа може лесно да се случи. Треба да се внимава и прво да се изведе инфраструктурата, како што е гасификацијата, па потоа да се работи на изградбата на паркинзи и други објекти што ќе се изведеваат над инфраструктурата. Мојот личен предлог би бил да се зачуваат младите во градот и би било добро ако градот може да ја искористи својата централна локација за изградба на бизнис инкубатори затоа што тоа е лесно изводливо како би можеле програмерите да работат во истите објекти и за странски работодавачи. Тоа се само канцеларии кои ќе ги стимулираат младите да останат и да работат од тука, од Велес и да внесуваат девизи во Македонија. Јас имам и подетален план бидејќи сум бил учесник во таков инкубатор изграден со донација од Норвешка, значи градот не учествуваше многу, а стојам на располагање за да допринесам во тој дел, рече Волфганг Аихер .

На патот кон село Црквино има асвалтна база зошто таа локација да не биде ставена на располагање за изградба на индустриска зона, праша жител на ова село во општина Велес.

-Сакам да прашам дали асфалтната база е загадувач на населението и на почвата затоа што таму има доста пчелари кои се подготвуваат да ги преселат пчелните сандаци? На тоа место доколку би се дала можност за индустриска зона тогаш препорачувам таа да биде наменета за лесна и незагадувачка индустрија. Исто така би преложил и локалитетот Бабуна – Пешти да влезе во овие проекти особено поради големиот број на објекти кои се изградени и легализирани. Ќе додадам дека во планираните места за изградба на спортски терени треба да се планира и селото Црквино, реќе жител од ова село.

Како 62 предлог проект, на предложената листа, влезе и проектот за доградба на цевководот кој треба да донесе вода од Брана „ Лисиче“ до „Езеро Младост“ со цел за полевање на земјоделските површини во велешко. Тој чини 28,5 милиони евра ,обезбедени пари од КФ банка со кои владата би изградила нов цевковод од брана Лисиче до филтер станица на ЈКП „Дервен“ а постоечкиот да биде резервен. И во заеднички канал да бидат поставени цевките кои би ја носеле водата за пиење до филтерна станица и за наводнување до езеро Младост.

Велешанецот Роберт Павлов даде предлог за забрана на возење на автобуси по патот – јужен излез на Велес се до крстосница Караслари и поврзување со автопат „Пријателство“ за да се обезбеди што поголема безбедност на велосипедистите рекреативци кои возат по патот.

-Патничките возила не претставуваат проблем но автобусите се сериозен проблем на велосипедистите рекреативци, особено во попладневните часови од денот. Тогаш на патот и скоро да нема коли за разлика од автобуси чиј број е голем. Така мислам дека ќе поттикнеме уште поголем број на граѓани да возат велосипед токму на таа релација, рече Павлов.

Членот на Советот на Општина Велес д-р Лили Чолакова Дервишова предложи во новото сообраќајно решение да не се отстрануваат семафорите во Велес затоа што тоа ќе донесе состојба да не може да се полага возачки испит во градот.

-Најавивте кружен тек кај мостот кон населбата Шорка. Ако се тргнат семафорите од таму, од сегашната раскрсница, тоа значи дека не ќе можат граѓаните да полагаат возачки испит во Велес бидејќи светлосните сигнали се значајни за граѓаните кои се обучуваат и кои полагаат возачки испит, рече Чолакова Дервишова.

Новото сообраќајно решение е многу илузионистичко за велешанката Светлана Далевска која се посомнева во неговото функционирање во град кои има само две централни улици.

-Доколку нешто навистина позитивно би направила словенечката фирма ангажирана да го подготви новото решение за сообраќајниот режим и тоа да биде функционално тогаш тоа навистина би било чудо во Велес. Ќе го поддржам и треба да има чуда. Сакам и друго нешто да кажам. Кога денеска бев во градскиот парк видов како тој не е уреден и чист а работниците за одржување си седеа со часови. И трето што ќе кажам е тоа дека волонтерството мора да земе замав во Велес. Јас живеев 25 години во Германија и морам да го истакнам како пример на тамошниот живот. Волонтерството мора да влезе во образовните програми па и практична работа, тие да го чистат од смет училишниот двор . Но, мора да се јакне и свеста на повозрасните граѓани за волонтаризам и за чиста животна средина и за уште многу сегменти во општествениот живот, рече Далевска.

Велешанецот Иван Ивановски предложи градот да размисли за булеварски решенија на сообраќајниците.

-Навремето улицата „Благој Ѓорев“ беше предлагана за булевар. Би предложил да се уреди според решението на градот Струмица, во кој пред Домот на култура, има огромен плоштад под кој мине улица но има и паркинг простор. Во Велес сметам дека може да се пробие подземен тунел од кружен тек Авона до Гимназија, па и подолу низ кој би се одвивал сообраќај а над тунелот да се уреди огромен простор во плоштад и шеталиште. Сега таму има зеленило и дрворед, па на крајната лента наместо за запирање просторот се користи за паркирање, рече Ивановски.

Сите Велешани можат да ја разгледаат предлог листата со приоритетни проекти, објавена на веб страницата на Општина Велес и да се изјаснат што за нив е приоритет. Можат да гласаат но и да предложат свои идеи. Тие ќе се сублимираат и така ќе помогнат во креирањето на планскиот развој на градот за наредните десет години./У.Ј