Д-р Андреев: Зајакнување на регионалната конкурентност, по сите основи, подобрување на квалитетот на живот на граѓаните и привлекување нови инвестиции и туристи

2.01.2020

Центарот за развој на Вардарски плански регион е стручно административното тело кое го реализира развивањето на деветте општини во централниот дел на државата. Со помош на Градоначалниците се прават планирањата за рамномерниот регионален развој додека со тимот во центарот и со општинската администрацја се подготвуваат проектните апликации со кои се конкурира кај домашни и странски донатори. Ова тело е од особено значење за граѓаните и локалните заедници Велес, Чашка, Лозово, Свети Николе, Градско, Росоман, Кавадарци, Неготино и Демир Капија. За тоа колку успеа центарот лани да го подигне квалитетот на живот на граѓаните во спомнатите општини и што тие треба да очекуваат годинава, во 2021, разговаравме со в.д Раководителот , д-р по економски науки Игор Андреев.

Дума.мк: Измина 2020 година, која по многу нешта ќе остане запаметена. Најмногу по корона кризата која сѐ уште трае. Како функциониравте во овие отежнати услови? Кои проекти ги реализиравте?

Андреев: Во право сте. Почетоците на корона кризата, всушност се совпаднаа со моето доаѓање на раководна позиција во Центарот за развој на Вардарскиот плански регион (ЦРВПР), при што, во целиот изминат период, кризата трае со несмален интензитет. Сепак, и во овие исклучително сложени услови на функционирање, со гордост можам да истакнам дека во текот на 2020 година, сѐ почнаа, дозавршија или при крај на реализација се вкупно 20 проекти, во вкупна вредност од околу 150.000.000 денари или 2.500.000 евра. Средства, кои покрај кофинансирањето од страна на некои од општините, во најголем дел беа обезбедени од страна на Владата, преку соодветните Програми на Министерството за локална самоуправа (МЛС) – Бирото за регионален развој (БРР) и Агенцијата за финансиска поддршка на земјоделието и руралниот развој (АФПЗРР), како и преку инвестициската и иновативната грантова шема на Швајцарската агенција за развој и соработка (СДЦ) во рамките на проектот “Одржлив и инклузивен развој”. Дополнително, за општините од регионот, голема можност претставува и грант програмата за мали проекти на Јапонската Амбасада, која и во услови на криза продолжи да се реализира со несмален интензитет.

Дума.мк: Рековте дека се реализирани 20 проекти во сите општини од регионот. Бројка која воопшто не е за занемарување. За кои проекти станува збор?

Андреев: Секако. Проекти се имплементираа во сите области и во сите општини. Имено, во 2020 година се заокружи инфраструктурното уредување на винската куќа во Кавадарци, сѐ почна и заврши системот за водоснабдување во с. Отовица, Велес, потоа инсталацијата на системот за греење и климатизација во Домот за култура во Свети Николе, реконструкцијата на дел од локалниот пат од с. Горно Врановци до регионален пат Р2344 Чашка – Дреново, како и на Улица 1 во с. Подлес во Градско, а се финализираше и речното корито на река Луда Мара во Кавадарци и проектот за набавка на специјализирани возила за потребите на ЈКП во Неготино, Д.Капија, Росоман и Лозово. Во изминатиот период се дозаврши изградбата на дел од пешачката патека до археолошкиот локалитет Била Зора во Свети Николе, како и на центарот за откуп на земјоделски производи во Градско, а сѐ реконструираше и сѐ опреми и мултифункционален објект за културно – уметнички и спортско – рекреативни настани во Лозово.
Исто така, се доизградија и делови од локалните патни правци с. Сливник – с. Бузалково во Велес и с. Горни Дисан – с. Вешје во Неготино, како и дел од велосипедската патека с. Ваташа – Моклишка Воденица во Кавадарци, а сѐ изврши и санација на пристапни патишта до земјоделско обработливи површини во Росоман. За одбележување се и проектите со чија помош се прошири и стабилизира планинарската патека до изворите на река Бабуна во Чашка, сѐ уредија качувачкиот локалитет кај Челевечка река и велосипедски и пешачки патеки во Демир Каписка клисура, сѐ изгради Скејт Парк во Кавадарци и сѐ набави опрема за анализа на масти, протеини и вода за Техничко – технолошкиот факултет во Велес. Во завршна фаза на реализација е проектот за изработка на техничка документација за изградба на јужна и северозападна обиколница во Неготино, а наскоро започнува имплементацијата на проектот за изградба на игралиште со пристап до езерото, набавка на реквизити и опрема за пливање за деца со посебни потреби на езеро Младост во Велес.

Дума.мк: Паралелно со реализацијата на сите горенаведени проекти, што е тоа што се сработи во 2020 година, а е вредно да се истакне?

Андреев: Во последниот квартал на 2020 година, се донесе новата четиригодишна Програма за развој на Вардарскиот плански регион, како најважен стратешки документ за идниот развој на регионот, а се одржаа и серија обуки за зајакнување на капацитетите на вработените во бизнис секторот за подготовка на апликации за учество на повици за финансирање од разни домашни и странски донатори.
На крајот на 2020 година, се редизајнираше и веб – страната на Центарот за развој на Вардарскиот плански регион, која континуирано ќе се надградува во следниот период. Планот е за брзо време, преку новата веб – страна и социјалните медиуми, да се заокружи интегрирана маркетинг комуникација со јавноста, во насока на значително зголемување на транспарентноста и понуда на корисни информации за сите чинители во регионот.

Дума.мк: Што граѓаните ќе можат да очекуваат во 2021 година?

Андреев: Плановите се да продолжиме со уште посилно темпо во насока на реализација на проекти од интерес на сите жители во општините од регионот. Имено, веќе се поднесоа апликациите за финансирање на исклучително значајни проекти за зајакнување на регионалната конкурентност преку Владината програма за оваа намена која се спроведува преку БРР и е во вкупна вредност од околу 45.000.000 денари. Проектите со кои се аплицираше, се однесуваат на набавка на мерни станици за смарт земјоделство во Кавадарци, Неготино, Д. Капија и Росоман, потоа, на кофинансирање за изградба на првата фаза од затворениот градски пазар во Велес, како и изградба на делови од три локални патни правци, со кои значително ќе се подобри туристичката понуда во регионот, патишта до манастирот Св.Архангил Михаил во Градско и спомен – куќата на Коле Неделковски во с.Војница, Чашка, како и патниот правец с.Ѓуземелци-с. Кнежје, во општините Лозово и Свети Николе.

Во текот на 2021 година се чекаат резултати и за повеќе проекти, за кои поединечно како Центар или во партнерство со општините и други организации, аплициравме на повиците на повеќе странски донатори. Во оваа прилика би ги споменал проектите кои се од огромно значење за сите општини од регионот, како што се: изработката на физибилити студија и техничка документација за изградба на регионален стационар за згрижување кучиња скитници (на повик на УНДП), како и за воспоставување регионален иновациски хаб (на повик на ЕУ за прекугранична соработка со Р. Грција). Во фаза на евалуација се и повеќе проекти, за кои се чека одговор од страна на Јапонската Амбасада, како што се: набавка на возило за потребите на Итната медицинска помош во Свети Николе, како и на неколку специјализирани возила за Чашка, Лозово и Росоман, потоа набавка на рентген апарат за Велешката болница, реновирање на дел од зградата на ООУ Блаже Коневски во Велес и др. Се разбира, во очекување сме и на објавата на новата Програма за финансирање на инвестициски и иновативни проекти на СДЦ, како и на Програмата за рурален развој на АФПЗРР и на повиците на сите останати странски донатори, кои ќе се фокусираат или рефоксуираат на поддршка на локалниот – регионалниот развој, на кои со сигурност ќе аплицираме со стратешки важни проекти за зајакнување на регионалната конкурентност.

Во периодот кој следува, во соработка со Фондот за иновации и технолошки развој (ФИТР), значително ќе се засилат активностите и на Бизнис центарот, кој постои во рамките на Центарот, со цел, да се подобри информирањето на фирмите од регионот за сите активни повици на ФИТР и да им сѐ помогне при аплицирањето. Исто така, ќе се обидеме да направиме и систем на секојдневно информирање и поддршка и на невладиниот сектор и на сите јавни институции во регионот, за можностите кои им стојат на располагање за искористување на средства од разни домашни и странски донатори.

Дума.мк: Што би порачале за крај?

Андреев: Покрај стандардните желби за здравје и дефинитивен излез од здравствената криза, потоа за поголем бериќет, враќање на нормалниот животен тек и заздравување на економската активност, би сакал да ја искористам оваа прилика да упатам неколку благодарности.

Прво, упатувам голема благодарност до Владата и сите надлежни Министерства и Владини институции, чија финансиска поддршка значително се зголеми во изминатиот тригодишен период, со што ги издвои, како најголеми поттикнувачи на рамномерниот регионален развој.

Благодарност и до сите странски донатори, кои се континуирани поддржувачи на општините од регионот, особено до оние кои и понатаму имаат фокус на финансирање регионални проекти, дури и во услови на незапамтена здравствена криза.

Посебна благодарност на Претседателот на Советот за развој на Вардарскиот плански регион и до сите останати осум градоначалници во општините од регионот, како и на вработените во Центарот и во општинските администрации, но и на претставниците на бизнис и невладиниот сектор, за нивниот огромен придонес за успешна имплементација на сите претходно споменати проекти.

Всушност, мојата финална порака гласи: „Заедно сме посилни“. Само на тој начин, доколку ги искористиме сите капацитети, можеме да постигнеме уште повеќе, во насока на зајакнување на регионалната конкурентност, по сите основи. И преку подобрување на квалитетот на живот на граѓаните, но и преку привлекување нови инвестиции и туристи.”
Продолжуваме со уште посилно темпо во 2021 година!

Убавка Јаневска