Велешката опозиција загрижена за безбедноста и биолошкиот квалитет на исхраната кај децата во градинките и учениците во основното училиште „Блаже Конески“ и Ученичкиот дом „Лазар Лазаревски“. Тие денеска на прес конференција излегоа со реакции за резултатите од последните анализи на одделението за хигиена и здравствена екологија при Центарот за јавно здравје направени на храната во овие установи. Опозицијата тврди дека при проверката на приборот за јадење во основното „Блаже Конески“ биле регистрирани бактерии кои можеле да предизвикаат цревни заболувања. Тие изјавија дека млекото и млечните производи не биле доволно застапени во оброкот кај децата, а според нив во оброкот , овошјето и зеленчукот требало да бидат повеќе застапени.

Водата во Дојракнското езеро е исправна и може да се користи за капење. Резултатите од последните анализи направени во Центарот за јавно здравје во Велес покажуваат дека таа е од втора категорија и нема штетни и опасни бактерии по здравјето на граѓаните. Мостри биле земени од четирите плажи кои претходно беа забранети за капење поради загаденоста на водата во езерото. Директорката на Центарот за јавно здравје д-р Флорентина Шурбевска Ристевска вели дека овие резултати се должат на соработката меѓу Центарот и општината која ги отстранила главните загадувачи на водата во езерото, а тоа биле фекалии испуштени од локали, викендици и куќи.

Шеесет и седум годишната В.Н од Свети Николе почина, додека триесет и осум годишните Н.М. и Е.Н. исто така од Свети Николе и триесет и три годишниот К.Ѓ од Радовиш се тешко повредени во собраќајната несреќа што се случи вчеравечер на магистралниот пат Велес-Штип, во близина на Градскта депонија. Повредените се префрлени во велешката болница, а еден од нив поради тежината на повредите е префрлен во хируршките клиники во Скопје.

Ажурен и ефикасен суд, вака е оценет Основниот суд во Велес за 2015 година. Според годишниот извештај за работата на Судскиот совет на Република Македонија , велешкиот суд успеал да реши голем дел од новопримените предмети а во голема мера го намалил и бројот на заостанати нерешени предмети, пишува во во соопштението.

Триесет граѓани од Велес, Гостивар, Скопје и Куманово денеска одлучија да бидат крстени на групната крштевка што за нив во водите на река Бабуна, крај Велес, ја организираше Епархијата Повардарска. Тие беа на различна возраст и имаа различни причини што досега не ја примиле христијанската вера. Александра Ѓоргиевска живее во Скопје. Тоа не ја спречи да биде дел од групата граѓани кои присуствуваа на чинот кои граѓаните ги воведува во верата и во Бога.

Целосно е уништена збирката на научна фантастика во кражба што се случила изминатава неделава во просторијата на Центарот за научна фантастика „Визија“ во Велес. Крадците го скршиле катанецот од просторијата што се наоѓа во поранешниот хотел „Вила зора„ и биле безмилосни кон книгите, списанијата и цртежите. Уништени се и првите македонски научно фантастични романи, издадени 1958 година, кои Центарот ги купил и ги чуваше како раритет. Претседателот Љупчо Михајловски вели дека глетката што го затекнала во просторијата го запрепастила.

Поврзани вести

Web banner Hit Portal Sinalco IceTea 2018 300x250px 01

Најново