Охридските хотелиери очекуваат да ја повторат ланската сезона

Охридските хотелиери и туристички работници за годинава очекуваат, ако не да ја надминат, барем да ја повторат ланската сезона. Ваквите очекувања се поврзани со веќе договорените тури, но и со фактот дека Европејците годинава помалку патуваат поради бегалската криза, а Македонија е дел од рутата.

Покрај стандардните гости од Холандија, годинава во Охрид ќе престојуваат туристи од Белгија, Германија и Полска. Стандардно се очекуваат и гости од Турција, Србија и од Бугарија, како и туристи на поминување од Израел, Кина и од Јужна Кореја.

– Сезоната веќе почна со велигденските и првомајските празнувања. Капацитетите беа полни со гости. Денеска доаѓа група од Холандија, а веќе кон средината на месецот доаѓа поголема тура холандски гости. Туроператорот „Corendon N“ денеска ја носи првата тура гости од Холандија, првиот чартер на туроператорот „TUI“ се очекува да пристигне во Охрид на 13-ти мај, а од годинава туристички групи во македонските езерски центри, ќе започне да носи и белгискиот туроператор „Thomas Cook“, чиј прв чартер лет до Охрид е најавен за 20-ти јуни – вели претседателот на Асоцијацијата на хотелиери, Крсто Блажески.

Според Блажески, хотелиерите очекуваат да ја повторат ланската сезона кога кај нив престојуваа над 16.000 туристи. Но тоа да се оствари потребно е да се задржи бегалската криза на сегашното ниво, без поголеми тензии.

– Европејците годинава поради бегалската криза помалку патуваат, но и покрај тоа, сепак европските земји се најпосетени од туристите. За нас е важно да не ескалира бегалската криза и да се задржи стабилноста на земјата за да се остварат договорените тури и да се обезбедат гости повеќе од балканските земји и викенд турите – вели Блажески.

Скоро сите хотели од охридското крајбрежје, вели тој, имаат некаков договор со странските туроператори.

– При преговорите со белгискиот туроператор „Thomas Cook“ скоро и да немавме капацитети па понудивме и вили, односно мали хотелски капацитети и ресторани што значи има работа за сите – подвлекува Блажески.

Сепак, вели тој, покрај хотелиерите кои треба да обезбедат одредени стандарди во сместувањето и исхраната на гостите за целосен туристички престој е потребна дополнителна понуда која треба да ја реализираат локалните самоуправи.

– Понудата треба да биде целосна за да имаме и добар ефект. Покрај квалитетното сместување и храната туристите сакаат да видат и историски споменици кои треба да бидат уредени, добри патишта и уреден град. Тука малку потфрламе. Дури сега се прават парковите, се почна со асфалтирање на улици, а до спортските центри кои треба да привлечат спортски туристи имаме депонии и паркинзи за автомобили. Со еден збор тоа треба да го нема за да имаме позадоволни гости кои ќе сакаат да се вратат повторно – смета Блажески.

Сепак, туристите се задоволни од она што им го нуди охридското крајбрежје – старата чаршија во Охрид, манастирите и културните споменици. Забележуваат само на новите мермерни коцки кои ги заменија старите камени коцки кои беа одлика на старата чаршија.

Извор: Плусинфо.мк