Заев го пречека Борисов во манастирот Водоча
Премиерот на Бугарија, Бојко Борисов на својот фејсбук профил објави видео од денешната средба со македонскиот премиер Зоран Заев, кај манастирот „Свети Леонтиј“, познат и како Водочки манастир, над Струмица.
Со тет-а-тет средба на премиерите на Македонија и на Бугарија Зоран Заев и Бојко Борисов во манастирот Водоча кај Струмица почнаа серијата активности во рамки на денешната заедничка седница на владите на двете земји, јави МИА.
Заев и Борисов по разговорите во Водоча ќе положат цвеќе пред споменикот на поранешниот претседател Борис Трајковски во центарот на Струмица.
Потоа се очекува пленарното заседание во Домот на АРМ во Струмица. Од бугарска страна на седницата ќе учествуваат вицепремиерите Томислав Дончев, Красимир Каракачанов и Екатерина Захариева, министрите Валентин Радев, Николај Нанков, Нено Димов, Румен Порожанов, Ивајло Московски, Емил Караниколов, Теменужка Петкова и Николна Ангелкова.
Се очекува да бидат потпишани девет документи за билатерална соработка во областа на надворешната политика, инвестициите, енергетиката, одбраната, туризмот, телекомуникациите, инфраструктурата и за реакции при природни катастрофи. Во текот на седницата треба да биде потпишан и меморандумот за разбирање меѓу Министерството за транспорт, информатичка технологија и комуникации на Бугарија и македонското
Министерство за информатичко општество и администрација за намалување на меѓународните тарифи за роаминг за телекомуникациски услуги, што го одобрија вчера владите на двете земји.
Договорите се дел од исполнувањето на Договорот за пријателство, соработка и добрососедство потпишан на 1 август годинава во Скопје.
Предвидена е и церемонија на врачување на специјализирано превозно средство за лица со попреченост, донација од Бугарија за општина Струмица.
Ова е прва меѓувладина седница што ја одржува Владата на Заев со Влада на држава од соседството. Во декември во Подградец е договорена и заедничка владина седница меѓу Албанија и Македонија, а во февруари или почетокот на март и со Србија.
