Продолжено породилното боледување на мајките со мали бебиња се до истекот на времените мерки
Министерството за труд и социјална политика го прифати барањето на мајките кои се на породилно отсуство за зголемување на времетраењето на породилното отсуство од 9 на повеќе месеци. Тоа значи дека мајките наместо 12 месеци покрај своите бебиња ќе останат се додека траат времените мерки прогласени поради епидемијата на „Ковид 19“.
„Министерството за труд и социјална политика ги информира дека се продолжува периодот на платено отсуство од работа поради нега и одгледување на новородено и посвоено дете се до истекот на траење на времените мерки. Со уредба со законска сила на Законот за работни односи што ја донесе Владата, отсуството од работа на работничка поради бременост, раѓање и родителство и посвојување, продолжува да тече и надоместокот на плата продолжува да се исплаќа до истекот на траењето на времените мерки за заштита од ширење и превенција од коронавирус COVID-19.
Продолжувањето на породилното отсуство ќе се регулира преку Фондот за здравствено осигурување на Република Северна Македонија.
Министерството за труд и социјална политика укажува дека заштитата на мајчинството е примарно, а грижата за здравјето и безбедноста на мајките и децата нема алтернатива,“ пишува министерството.