АСОМ: Ќе ги преземеме сите мерки спорниот Закон за игрите на среќа да не се донесе

16.04.2021

Асоцијацијата на спортски обложувалници на Македонија бара од Владата да не ги имплементира измените на Законот за игрите на среќа и за забавните игри и да воведе квалитетен закон со кој ќе се постигнат низа позитивни промени. Од АСОМ на денешната прес-конференција предупредија дека ќе ги искористат сите расположиви средства, вклучително и протести за да го спречат донесувањето на законот.

-Асоцијацијата на спортските обложувалници во Македонија, членовите на Асоцијацијата, но и голем број на фирми соработници поставија повеќе од 250 коментари за Законот, што содржи низа нелогичности и ограничувања. Доколку се донесе Предлог-законот во оваа форма, одговорно тврдиме дека се става крај на легалното приредување игри на среќа и се оставаат на улица повеќе од осум илјади вработени во оваа дејност, изјави претседателот на АСОМ, Васко Илијевски на денешната прес-конференција пред Владата.

Илијевски посочи дека предлогот за воведување физичка дистанца на објектите за игри на среќа од основните и средните училишта е целосно неприфатлив.

-Предлогот за дистанца од 500 метри значи затворање на повеќе од 98 проценти од објектите што сега работат, покажуваат анализите што ги направивме во изминатиот период. Физичката дистанца нема позитивен ефект врз навиките на играчите и никаде во светот, со ниту една студија не е прикажан позитивниот ефект. Стравуваме дека зад овој закон де факто стои интерес за забрана на легалната индустрија на игри на среќа и затворање на објектите, но можеби и други скриени интереси, истакна претседателот на АСОМ.

Ваквиот Предлог-закон нема да ја постигне целта за уредување на игрите на среќа, заштита на играчите или зголемување во приходот на буџетот, бидејќи, како што посочи Илијевски, со затворање на објектите ќе ги снема приходите во буџетот што изнесуваат повеќе од 250 милиони евра на годишно ниво.

-Ваквиот Предлог закон ќе ја намали економијата, во услови на економска криза кога целото стопанство работи со половина капацитет и скратено работно време поради ковид мерките, ваквите експерименти се недозволени и можат да бидат многу опасни по домашната економија и вработувањата, додаде тој.

Како што посочи Илијевски, од оваа гранка директно и индиректно редовни примања имаат повеќе од 54 илјади луѓе, многу семејства ќе останат без приходи, а најмногу ќе настрадаат најмладите на кои ова им е единствен приход, што ќе доведе до зголемување на невработеноста кај младите лица.
Претседателот на АСОМ истакна дека Законот е целосно контрадикторен и економски неиздржан и се подготвува без соодветни економски анализи и импликации.

-Го поздравуваме предлогот за онлајн приредување игри на среќа што е прифатлив, но само доколку останатите аспекти на Законот се прилагодат според европските закони и пракса. Јасно порачуваме дека нема да напредуваме без добро осмислен европски закон. Со ваков Закон Владата ќе отвори пат за црн пазар, диви обложувалници, небезбедно играње и сива економија, додаде Илијевски.

АСОМ бара итно отстранување на физичката дистанца од Законот со цел превенција на затворање на индустријата и поставување на нов коригиран закон на Единствениот национален електронски регистар на прописи, сведување на давачките од пет илјади евра по уплатно место, на разумно ниво со цел економска исплатливост за приредувачите, како и јавна дебата со претставниците на Владата кои го предлагаат овој Закон.

Илијевски порача дека доколку Владата не покаже добра волја, ќе бидат преземени сите мерки и расположливи средства да не се донесе овој закон. Доколку е потребно, рече, ќе делуваат и преку протести со цел да се реши проблемот.