Зошто е важно во вашиот организам да има доволно калиум?

08.04.2021

Ако често јадете храна што доаѓа спакувана во кесичка или кутија, веројатно имате премногу малку калиум во вашето тело, тврди нутриционистката Лорен Блејк од Медицинскиот центар Векснер во Охајо.

Калиумот обезбедува правилна мускулна контракција во организмот, ги регулира телесните течности и рамнотежата на минералите во организмот.

Покрај тоа, ги ублажува ефектите од прекумерната потрошувачка на сол, проблем со кој се соочуваат многу луѓе ширум светот. Пред сè, ги штити крвните садови од оштетување и задебелување и го намалува високиот крвен притисок.

Овие се најчестите знаци дека во телото ви недостига калиум:

Замор

На телото му треба калиум за нормално функционирање. Ако сте постојано уморни, а спиете колку што треба, една можна причина  е недостаток на калиум, тврди Лорен Блејк. Заморот исто така може да биде резултат на стрес, лоша исхрана и недостаток на сон, кои исто така се проблеми поврзани со недостаток на калиум во организмот.

Грчеви во мускулите

Калиумот е неопходен за правилно функционирање на мускулите низ целото тело. Кога нивото на овој минерал во телото е ниско, чувствуваме болка и грчеви во текот на денот или додека вежбаме.

Чувствувате слабост и вртоглавица

Нивото на калиум може да варира во текот на денот, а големиот пад на овој минерал во организмот може да доведе до забавување на отчукувањата на срцето, поради што може да се чувствувате омалаксано и дека секој момент ќе изгубите свест.

Ова не е вообичаено, но доколку ви се случи вам, задолжително посетете лекар, предупредува американскиот нутриционист. Не го игнорирајте ниту чувството на трнење во рацете и нозете.

Висок крвен притисок

Без соодветни количини на калиум во телото, крвните садови може да се стеснат, што доведува до висок крвен притисок. Исто така, внимавајте на срцевите палпитации – најважниот мускул во телото не може да работи добро кога има нерамнотежа на натриум и калиум во телото.

Постојана надуеност

Телото има проблеми со регулирање на солта кога на телото му недостасува калиум. Сето ова може да доведе до надуеност. Ако често сте надуени, ова може да биде една од причините.

Храна богата со калиум

Колку калиум треба да внесувате дневно? За правилно функционирање на организмот, возрасните треба да внесуваат 4 до 5 грама калиум. Поголемиот дел се внесува преку исхраната, а може да се компензира со додатоци.

Важно е да се придржувате до препорачаните дневни дози за да избегнете несакани ефекти на вишок калиум во организмот.

Која храна има најмногу калиум?

Храната богата со калиум е присутна на секој чекор и не е тешко да се внесе дневната доза само преку храна.

За да спречите губење на калиум од организмот, јадете храна богата со калиум:

• банани – една банана со средна големина има околу 400 милиграми калиум
• компири – еден компир со средна големина со кора има околу 600 милиграми калиум
• јогурт со малку маснотии – една чаша јогурт има околу 580 милиграми калиум
• млеко – чаша обезмастено млеко има околу 350 милиграми калиум
• бел грав – чаша грав има околу 580 милиграми калиум
• спанаќ – чаша варен спанаќ содржи 839 милиграми калиум
• леќа – половина чаша варена леќа има околу 370 милиграми калиум
• суво грозје – четвртина чаша суво грозје има 250 милиграми калиум
• диња – чаша диња има околу 430 милиграми калиум
• брокула – чаша варена брокула има околу 460 милиграми калиум.

Калиум во месо и риба:

• пилешко – 85 грама пилешки гради има околу 218 милиграми калиум
• свинско месо – 85 грама печено свинско месо има околу 382 милиграми калиум
• туна – 85 грама туна во конзерва има околу 200 милиграми калиум
• лосос – 85 грама лосос има околу 326 милиграми калиум.

Храната богата со калиум е во изобилство и може да се комбинира на вкусен и здрав начин. Обидете се да подготвите овошје и зеленчук без да ги лупите, бидејќи лушпата содржи и многу важни минерали.

Не претерувајте со оваа храна, особено со онаа во која има висока содржина на калиум. Обидете се да останете во рамките на препорачаната дневна доза.

Мите Јаначков