Издумани Крлевизми за мрзеливоста: „Работата од мајмун направила човек. Мрзата – обратно!“

„Читајте Издумани Крлевизми! Го острат духот, а лечат и од мрзеливост“ вели афористичарот Крлевски за своите нови издумани Крлевизми. Уживајте!

-Мрзеливоста е одмор помеѓу два оброка.

-Блазе им на влекачите! Ем лежат, ем одат.

-Кој рано рани, има време да си прелегне.

-Мрзеливите не сакаат да живеат од стара слава.

-Денот по утрото се познава, ама јас спијам до два попладне.

-На денешните млади секој ден им е како во сон. Го преспиваат!

-Мојот одмор секогаш е во убаво друштво… меѓу две паузи.

-На многу места плаќаме за залудно да го поминеме времето.

-Оптималната работна температура ја постигнувам под сенка.

-Пред да направам било што, бројам до десет. Потоа не правам ништо.

-Кога не правам ништо, не знам што да правам и со себе.

-Работата од мајмун направила човек. Мрзата – обратно!

-Во кујната сум виртуоз. За да не мијам чинии јадам од тенџере.

-Сум нашол многу места под сонцето, но ниту едно не било под сенка.

-Животот ми е бајка. Затоа ми минува во спиење.

-Се фокусирам на работата, но фокусот секогаш ми се поместува за утре.

Афористичар Атанас Крлевски

Дума.мк