Комитетот за имунизација предлага трета доза да се прима за три месеци од втората вакцина

Во Министерството за здравство се разгледува можноста за намалување на временскиот период за примање на бустер доза, од шест на три месеци, со цел поголема заштита од новиот сој на коронавирусот – омикрон. Комитетот за имунизација ова го предлага врз основа на студии кои покажуваат дека веќе по четири месеци доаѓа до намалување на нивото на антитела. Во тек е постапка за усвојување на одлуката, велат од МЗ за „Вистиномер“

Пишува: Зоран Димовски

Комитетот за имунизација предлага третата или таканаречена бустер доза да може да се прими по поминати три месеци од втората доза вакцина, односно да не се чека како досега половина година.

Се разгледува можноста за намалување на временскиот период за примање на трета доза вакцина, од шест на три месеци, со цел заштита од новиот сој на вирусот ковид-19, омикрон. Комитетот за имунизација ова го предлага врз основа на студии кои покажуваат дека веќе по четири месеци доаѓа до намалување на нивото на антитела. Во тек е постапка за усвојување на одлуката, по што Министерството за здравство ќе ја информира јавноста, соопштија за „Вистиномер“ од Министерството за здравство.

Од Здравствениот дом Тетово, еден од поголемите  во земјава кој опслужува пациенти од Тетово и останатите пет рурални општини од тетовскиот регион, очекуваат дека со оваа одлука ќе се зголеми интересот за трета доза, ако се има предвид дека новиот сој на коронавирусот – омикрон се смета за позаразен.

Според некои сознанија, со примање на третата бустер доза, омикрон сојот нема да влијае толку негативно на организмот и луѓето ќе поминуваат со полесни симптоми. Сега сите го очекуваме омикрон сојот, а со тоа ќе се зголеми и интересот за третата доза, која сега најверојатно ќе се прима и за пократок период, по инјектирањето на втората доза, вели Борислав Јоргаќиевски, директор на Здравствен Дом Тетово.

Во меѓувреме процесот на имунизација во Тетово се одвива само во една од бараките на просториите на Здравствениот Дом Тетово. За разлика од изминатото лето, кога имаше неколку пункта поради зголемениот интерес за вакцинација, сега се прима вакцина само во еден пункт каде во просек се инјектираат до 300 вакцини.

Сегашната состојба може да се опише како затишје пред бура, ако се земе предвид дека кај луѓето секогаш се буди интерес за имунизација кога има голем број заразени, а ваквата статистика се очекува во периодов што следи, поради најавите за нов бран на омикрон сојот, дополнува директор Јоргаќиевски.

Како да се натераат луѓето на помасовна имунизација, односно нивниот интерес да не се зголемува само кога расте бројот на позитивни случаи, кога се влошува состојбата со ковид-19, „Вистиномер“ побара одговор од координаторот на вакциналниот пункт при Здравствениот Дом Тетово, доктор Бесник Мустафа.

Кај нас се случува тогаш кога има нови мерки да се буди интересот на граѓаните за да се вакцинираат. Во време кога состојбата е мирна, интересот за имунизација драстично паѓа. Сметам дека има многу фатори за тоа, но најголем непријател се антиваксерите и лажните вести кои се шират низ социјалните мрежи. Сум зборувал и пак ќе кажам, за сите тие граѓани кои сакаат да знаат повеќе за имунизацијата да слушаат соодветни стручни лица. Според мене, треба поголема кампања, сметам дека власта недоволно спроведуваше кампањи, треба на народот да му се објасни што претставува имунизацијата. Многумина имаат само слушнато вакцина, но не знаат што е вакцина. Треба да има едукација, антиваксерите ги има на социјалните мрежи во многу голем број, а треба да биде спротивно – и по традиционалните медиуми и на социјалите мрежи да има луѓе кои ја промовираат вакцината како најголем спас од ковид-19, да се објаснува полезноста од вакцината, вели доктор Мустафа.

Во Клиничката болница во Тетово во моментот има само неколку хоспитализирани пациенти со ковид-19. Состојбата со вирусот е смирена, а голем дел од оние кои изминативе два месеца бараа болничко лекување, не беа вакцинирани.

Последната анализа на Министерството за здравство, покажува дека процентот на хоспитализирани лица кои се невакцинирани изнесува 85 отсто, додека само 15 отсто од сите моментално хоспитализирани пациенти се целосно вакцинирани. Исто така, анализата покажува дека смртноста кај невакцинираните е драстично поголема. Во период од 06.08.2021 до 23.12.2021 на територија на државата починале 2.362 лица со ковид-19, 1.850 пациенти од починатите не биле вакцинирани, а само 21 отсто примиле вакцина.

Од Здравствениот дом Тетово, засега се задоволни од процесот на имунизација, ако се земе предвид фактот дека Тетово четвртиот бран во месец  јули годинава го дочека со само 19 отсто вакцинирано население. За неколку недели овој процент се зголеми на 36,9 отсто,  но сепак градот под Шара се вбројува меѓу градовите со најниска стапка на имунизација. Според податоците што ги добивме од Министерството за здравство, во моментот (30.12.2021) процентот на вакцинирано население во Општина Тетово е 43,9 отсто за цела популација, додека кај лицата на возраст над 18 години опфатот изнесува 56,2 отсто.

Од Здравствениот дом Тетово  се надеваат зимава процентот уште повеќе да се зголеми, а наредната година да се постигне колективен имунитет.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар