Не е точно дека омикрон е производ на вакцинацијата

Научно е потврдено дека од вакцините не може да се инфицирате од коронавирусот. Вакцината не содржи никаков жив или активен дел од овој вирус. Научната јавност е децидна дека најважниот фактор што го зголемува ризикот од мутации е ширењето на вирусот. Колку вирусот повеќе се шири на одредено место, толку е поголема веројатноста за уникатна мутација. Имено, варијантите на вирусите не се појавуваат поради тоа што луѓето се вакцинираат. Напротив, масовната вакцинација може да ги спречи варијантите. Според директорот за итни ситуации на СЗО, д-р Мајк Рајан, нема знаци дека новата варијанта на коронавирусот – омикрон, поуспешно ќе ги избегнува вакцините од другите соеви

Во пост на Фејсбук се шири опасна дезинформација дека новиот сој на коронавирусот наречен омикрон е производ на вакцинацијата, што е апсолутно неточно. Авторот во антиваксерски стил ги навредува граѓаните, кои ѝ веруваат на науката.

Во постот стои:

Пред помалку од една недела беше најавен новиот Сој во циркусот наречен Кромид19. Пазете сега, веднаш во цел свет веќе имаат тест за него и веднаш го препознаваат уште на аеродром, а од друга страна сите политичари, не доктори, политичари не убедуваат како тоа инекцијата заедно со бустерот ќе биле делотворни и за овој Сој, иако е нов. Логиката од друга страна вели дека во авион на пример се качуваат само боцкани патници, така да најверојатно новиот Сој воопшто не е Сој, туку некаков производ на вакцинацијата, кој сега го маскираат како нова варијанта. Ете оваа ти е таа најбрзата наука на сите времиња во која треба да поверуваш, ако си кретен. Ако не, најверојатно размислуваш со своја глава. Слободно продолжи така, блиску им е крајот.

Јужна Африка е земјата каде за првпат беше откриен новиот сој омикрон, за кој е докажано дека брзо се шири и досега го има во 77 земји низ светот.

Новата варијанта на САРС Ков-2, B.1.1.529 – омикрон, првпат беше откриена во примероците собрани на 11 ноември 2021 година во Боцвана и на 14 ноември 2021 година во Јужна Африка, објави американскиот Центар за контрола и превенција на болести.

Научно е потврдено дека од вакцините не може да се инфицирате од коронавирусот. Вакцината не содржи никаков жив или активен дел од вирусот ковид-19.

Ниту една авторизирана вакцина против ковид-19 во САД не содржи жив вирус кој предизвикува ковид-19. Вакцината поради тоа не може да ве зарази со ковид-19, пишува на страницата на ЦДЦ.

Центарот за контрола и превенција на болести вели дека ковид вакцините се безбедни и ефикасни, не може да ве разболат и може да го спречат ширењето на коронавирусот.

ВИРУСИТЕ МУТИРААТ, НО НЕ ПОРАДИ ВАКЦИНИРАНИТЕ

Вирологот Фридеман Вебер од универзитетот Јустус Либиг во Гисен, во интервју за ДВ појаснува дека не се вакцинираните, туку невакцинираните лица оние кои ја предизвикале мутацијата.

 Заразените лица предизвикаа нов сој и заобиколување на имуниот систем, вели тој. Тоа го укажува ситуацијата во Индија, Бразил и Јужна Африка. Таму се настанати сега проширените варијатни, а бројот на вакцинирани лица е многу мал. Мутациите се појавуваат токму во земјите во кои се уште не е достигната висока квота на вакцинирани лица и многу луѓе се мешаат во мал простор, вели Вебер за ДВ.

За да се размножуваат вирусите својот генетски материјал го аплицираат на клетката домаќин. При секоја репродукција се појавуваат мали грешки во копирањето на тој генетски материјал и секоја од тие грешки го менува и генетскиот код на вирусот, односно тој постојано мутира и тоа е сосем нормална појава. Некои такви мутации го прават вирусот поефикасен, на пример кога благодарение на нив може да помине незабележан од имуниот систем и покрај вакцина или прележана болест, а некои од нив го заслабнуваат. Во еволуцијата на соеви на вирусот важи правилото дека се наметнува најсилната мутација. Во однос на коронавирусот тоа значи дека соевите кои се повирулентни ги потиснуваат помалку опасните варијанти на вирусот.

Научната јавност е децидна дека најважниот фактор што го зголемува ризикот од мутации е ширењето на вирусот. Колку вирусот повеќе се шири на одредено место, толку е поголема веројатноста за уникатна мутација. Имено, варијантите на вирусите не се појавуваат поради тоа што луѓето се вакцинираат. Напротив масовната вакцинација може да ги спречи варијантите

Малдита Сиенсија Пепе Алками, вирусолог од Здравствениот институт Карлос Трети посочува дека вакцините не предизвикуваат вирусот да мутира повеќе.

Најкритично за развивање на нова мутација на вирусот ќе биде кога половина од луѓето ќе бидат вакцинирани, а другата половина не. Но, кога 85 проценти од населението ќе биде вакцинирано тогаш ќе биде многу тешко за вирусот да генерира варијанти за да ѝ избега на вакцината, зашто ќе треба да се реплицира многу, за да пронајде варијанта на отпорност на вакцината, вели  вируслогот Малдита Сиенсија Пепе Алками.

Алками смета дека за да се одбегне првото сценарио, треба да се вакцинира целата популација што побрзо и да се контролира вирусот со превентивни мерки. Вакцините според него ќе заштитат против развојот на мутации и нови варијанти и поради тоа е потребно  што помасовна имунизација.

СПОРЕД ПРВИЧНИТЕ АНАЛИЗИ ПОСТОЕЧКИТЕ ВАКЦИНИ ШТИТАТ ОД ОМИКРОН

Постоечките вакцини би требало и понатаму да ги штитат луѓето кои ќе се заразат со омикрон сојот од посериозен развој на ковид-19, соопштија експерти од Светската здравствена организација (СЗО).

Овие информации доаѓаат откако научната јавност изрази сомнеж дека ќе постои многу голем пад во тоа колку успешно антителата кои ги создаваат вакцините можат да се справат со новата варијанта.

Сепак, директорот за итни ситуации на СЗО, д-р Мајк Рајан, вели дека нема знаци дека омикрон поуспешно ќе ги избегнува вакцините од другите соеви, пренесува Би-Би-Си.

Имаме високо ефективни вакцини, кои се покажаа ефективни против сите варијанти досега во поглед на сериозна болест и хоспитализации, и не постои причина да очекуваме дека тоа нема да продолжи и со Омикрон, вели Рајан.

Тој додава дека првичните податоци покажале дека омикрон не предизвикува посериозна болест отколку Делта варијантата и другите соеви на коронавирусот.

Поради сите горенаведени факти оценуваме дека не е вистина дека вакцината против ковид-19 го предизвика новиот сој омикрон.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар