Зимските вируси повторно ги напаѓаат најмладите!

Детското одделение при кавадаречката болница и натаму е полно.

Зимските вируси кои нападнаа по најмладите се причина за проливи и бронхопневмонии. Едни си заминуваат, а веднаш доаѓаат нови пациенти велат од детско одделение.

“Овие вируси  можат да предизвикаат за жал и доста лоша клиничка слика. Во светот веќе се дава вакцина против рота вирусот кој е најчест причинител на проливи во раната детска возраст. Покрај тоа што го напаѓа цревниот  тракт рота вирусот го напаѓа и респираторниот тракт така да имаме комплетно болни деца. Ретко кое од децата избегнува  да не му биде зафатен и вториот тракт, да остане само со проливи или  само со инфекција на дишните патишта и тоа обично бронхопневмонии. Едни легнуваат, други стануваат. Ова се случува особено во нашиот регион. Во општините Кавадарци, Неготино, Росоман и Демир Капија има зголемен број на болни од оваа вироза.  Според моите сознанија во некои други болници вирусно болни има помалку“ рече примариус д-р  Лидија Димитрова, началник на детскиот оддел.

Лекарите препорачуваат децата да се држат понастрана од настинати и болни и да се избегнуваат масовни собирања.