Три години постоење на „Банка за храна“ Кавадарци, поделени 70 тони храна во општината

Кога пред три години ја подготвуваа иницијативата за отворање на подружница во Кавадарци на Банка на храна МК и ЕД „Еко живот“ пред себе имаа повеќе дилеми. Поточно како да обезбедат простор во кој ќе се складира донирана храна и како таа најбрзо да стигне до најранливата категорија на граѓани во општината. Нивната најголема потпора беа неуморните волонтери и желбата што поголем број на граѓани од најризичната категорија да бидат месечно обезбедувани со храна.

Оваа успешна приказна и добра практика на граѓанскиот сектор ја доби поддршката на Општина Кавадарци. Кога локалната институција процени и обезбеди услови работа на граѓанските организации, Банка на храна Македонија од Скопје и ЕД„Еко живот“ од Кавадарци директната придобивка за граѓаните во оваа општина од Вардарски регион сега изнесува 70 тони поделена храна и помалку гладни сограѓани.

Секако, во успешната приказна не смеат да не се спомнат  партнерите, поточно донатори на храна, кои несебично, секојдневно ја покажуваат својата хумана страна и желба за заедничка борба против гладот и сиромаштијата, насочена кон постигнување на една и единствена цел како што е „Нула глад“ во Општина Кавадарци, вели Роберто Паризов од Банка за храна во Кавадарци.

-Се формиравме како иницијатива во која учествувавме градоначалник на Кавадарци Митко Јанчев, Банка за Храна МК и Еко-живот. Целта ни беше борба против гладта и сиромаштијата. Проектот го крстивме “Нула Глад во Кавадарци”, кој се уште работи и функционира. Преку овој проект досега се поделени над 70 тони храна и пијалоци. Нив ги собравме, спакувавме и доставивме до домовите на семејствата кои имаат потреба од дополнителен оброк. За три години спакувавме и поделивме над 4 000 пакети со храна, пијалоци и хигиенски средства, додаде Паризов.

Совет на Општина Кавадарци со одлука отстапи простор поточно складиште за потребите од прием и пакување на храната, како и возило за достава на истата до крајните корисници. Дел од нив живеат во населени места на територијата на општината коишто се оддалечени и по 40 км од Кавадарци.

-Сега ни преостанува да ја формализираме „Банка за Храна МК-Кавадарци“ како официјална организација под капата на Банка за Храна МК. Очекуваме да станеме регионален центар за Тиквешки регион.  Очекуваме повеќе волонтери и опрема за работа. Работа има многу исто како и семејства со потреба од храна.. Би додал дека на располагање ни е и соработката со Меѓуопштинскиот Центар за социјални работи со кои имаме прекрасна соработка и ќе се трудиме таа соработка да биде уште поголема во интерес на семејствата во социјален ризик, додаде Паризов

Тој апелираше  до хуманите граѓани и институции да бидат солидарни и да не заборават дека големината на секој човек се мери по неговата доблест да сподели со гладниот и сиромашен сограѓанин дел од тоа што го има на семејната трпеза, од храната или пијалокот што ги произведува како и од вишокот храна што останала во трговската мрежа или пак во угостителските објекти.

Убавка Јаневска