Учесниците на летната младинска академија ги добија своите сертификати

Десет средношколци коишто успешно ја завршија втората по ред Летна Младинска Академија којашто ја спроведуваше Младински центар Велес, денеска, во Јуроп хаус свечено ги добија и своите сертификати. Тие во текот на летниот период учеа на темата „Правата на младите и како тие се застапуваат со нив“, посетуваат предавања коишто траеа и по два ипол часа, пишуваа домашни, стекнуваа нови знаења и најбитно се дружеа.

Сертификатите им ги додели младинскиот работник Ивана Јордева и на средношколците им вети дека ваков тип на академии ќе се организираат и во текот на целата година.

-Денеска со доделување на сертификатите го заокружуваме и крајот на втората по ред Летна Младинска Академија. Оваа година нашите средношколци учеа, се дружеа и слободното време го поминуваа на корисен начин. Наша цел годинава ќе биде да организираме што е можно повеќе академии бидејќи средношколците имаат желба да се едуцираат и во текот на целата година, објасни Јордева.

Присутните средношколци изразија голема благодарност за можноста да бидат дел од оваа академија која им помогнала да научат многу нови работи на разни теми.

-Јас на оваа академија присуствував бидејќи ми се допаѓаше темата и сакав да ги проширам своите знаења. Оваа академија беше супер за ова лето и времето беше убаво и интересно пополнето. Секако дека би дошла и следното лето, рече средношколката Сандра Атанасова.

Работилниците за време на академијата беа спроведувани во Јуроп хаус Велес.

Стефани Манева