Анѓушев од Велес: Да не извезуваме деца туку производи од Македонија – Димитров: Ќе гласам за да ставиме печат за независноста на Македонија – Коцевски: Убеден сум, референдумот ќе успее

Со потсетување на неговиот најчесто употребуван слоган: „Ќе не биде“, прво соопшен на протестниот собир пред зградата на Владата а потоа и во два наврати пред и по последните парламентарни избори, актуелниот Министер за надворешни работи Никола Димитров го започна своето обраќање пред велешани, синоќа, понеделник 23 септември на трибината „Излези за Европска Македонија“ на платото пред зградата на театарот „Јордан Хаџи Константинов Џинот“ во Велес.Велејќи дека дошло време и оваа генерација на Македонци „да ги фати дизгините“ Димитров констатираше дека никој не го боли повеќе за Македонија од нејзините граѓаните кои во неа живеат затоа што „иако се малку, само граѓаните се господари на својата судбина“ .

Повикувајќи ги на единство без разлика на националност, вера и пол Министерот Димитров пред велешани соопшти дека се чувствувал повреден од последната изјава на Претседателот на Република Македонија, Ѓорѓе Иванов и порача дека претстојниот референдум не бил за да се бега туку за да се потврди решение.

-Прв пат за толку тешко прашање најдовме решение, што во Договорот во член 7 потврдува дека сме македонски народ, во член 1 став 1 параграф В потврдува дека македонскиот јазик е македонски јазик, за што грчката опозиција прави партал од Владата во Атина иако не смеат бидејќи се работи за самоопределување и не може во Европа никој нас да ни каже што сме. Кој мене ќе ми каже дали сум Македонец или не сум или Вас. Исто така се работи и за самодоверба. Ние сме малку како во брза река и стоиме на камен а треба да рипнеме на брегот.Тие викаат не ќе стоиме на каменот. Ама 27 години стоиме на каменот. И додека ние стоиме другите си врват. Хрватска влезе во НАТО во 2008 година и во ЕУ во 2013 година. Црна Гора влезе во НАТО во јуни 2017 година и денеска читам вест од кредитните куќи што мери рејтинг дека измерила од стабилен позитивен што значи ќе растат, ќе одат напред. Додека ние си стоиме на каменот другите си испливаа на брегот и си одат напред, рече Димитров.

Прашувајќи што е патриотизмот, дали е страв или храброст Министерот за надворешни работи Димитров апелираше граѓаните преку гласањето на референдумот да го соопштат сопствениот став.

-Народот зборува преку гласање. Го отктивме патот, го имаме, на 30 септември народот го прашуваме. Бегањето од референдум е бегање од гласот на народот. Значи политичар може да направи кариера од вакво прашање . Многу ме нервира кога се бара вина кај другите. Наша е оваа држава, наша е оваа сегашност, наша е иднината. Од нас се зависи. Ова е задача на нашата генерација. Јас гласав на првиот референдум пред 27 години, ќе гласам и сега за да ставиме печат, да ја завериме независноста на Република Македонија, да инвестираме во стабилноста затоа што НАТО членството значи дека Македонија е тука, да остане во овие граници и никој веќе да не се прашува дали ќе ја има и каква ќе биде, додаде Димитров.

Велес, во изминатите 27 години, бил незаслужено одминуван но е град што треба да добие поголема помош, констатираше заменикот на Претседателот на Владата, Кочо Анѓушев. Велејќи дека економскиот развој е токму неговиот ресор Анѓушев додаде дека како што е надлежен за развојот на севкупната економија така како роден велешанец со поддршката од своите велешани ќе се обиде да помогне во економскиот развој на Велес. При тоа констатираше дека треба да сопре извозот на млади и да се зголеми извозот на велешките, македонските производи во Европа и светот.

-Ве молам дајте да не извезуваме деца од Македонија туку да извезуваме производи, како што покажавме дека знаеме, тоа е суштината. А вие драги мои сограѓани тоа најдобро го знаете. Ако имате доверба во ова што го зборувам а фатктите ги потврдуваат моите зборови, ве молам излезете на 30 септември, дајте го својот глас „за“ своите деца, за иднината на државата,за нашиот Велес, за Македонија перспективна, економски стабилна. Сакам да им порачам на тие што се двоумат дека ова не е партиска битка на избори ова е битка за државата, заборавете ги дневнопартиските околности. Јас сум граѓанин на Велес кој прифати да биде член на оваа Влада и сакам да просперира Македонија што го препознав во оваа Влада и затоа барам да ја поддржите, рече Анѓушев.

Додавајќи дека граѓаните не треба да се плашат бидејќи не е можно да се има полоша иднина од онолку лоши работи во минатото, Анѓушев, го соопшти првиот европски успех на Велес со добивањето на еден милион евра европски пари за проект за целосна реконструкција на езеро „Младост“.

-Неофицијално можам да соопштам дека првите средства од грантовите на ЕУ ќе стигнат за проект што се однесува на велешкото езеро и од нив сите ќе ги почувствуваме благодетите. Тие што се одговорни во Општина Велес веќе знаат а останатите брзо ќе дознаат. Да сте здрави и живи сите, рече Анѓушев.

Секоја генерација има свои визии, свои соништа, своја кауза, а сонот на нашата генерација,животната одлука треба да ја донесе за тоа што треба да го направиме е на 30 септември, рече Градоначалникот на Велес Аце Коцевски.

– И со нашиот глас на референдумот долгорочно да ја одредиме судбината на Република Македонија во наредниот период. Јас сум убеден дека референдумот ќе успее но и да не успее ние мораме да наоѓаме решенија како да го заокружиме целиот процес до крај затоа што Македонија друг процес, друга алтернатива нема. Затоа 30 септември е од големо значење за сите нас, за нашите деца, за нашите внуци. Ние мораме да ја пренесеме пораката до нашите роднини, пријатели, соседи без оглед на нивната политичка и верска припадност затоа што референдумот не е политичко прашање под привилегија само за ВМРО или на СДСМ туку е надполитичко прашање од врвен интерес што е важно за сите граѓани на Република Македонија. Особено сакам да упатам порака до членовите и симпатизерите на ВМРО ДПМНЕ . Жалам што оваа политичка партија се доведе до многу незгодна ситуација од која не може да се врати во рикверц назад затоа што премногу далеку отиде за да може поинаку да се однесува. Јас имам разбирање за тоа но сепак апелирам да се издигнат над сето ова и да сватат дека во овој момент има многу посериозни работи за Република Македонија освен нивните ситни политички интереси . Верувам дека има уште неколку денови до вистинскиот момент за да се преиспитаат и да го направат вистинскиот чекор за нив, рече Коцевски.

Тој ги искоментира последната изјава на Претседателот на Република Македонија, Ѓорѓе Иванов и однесувањето на Митрополитот Повардарски Агатангел. За постапките на Иванов рече дека даваат лош пример на граѓаните и додаде дека е разочаран од однесувањето на Митрополитот Агатангел затоа што како верник смета дека улогата на високите црковни великодостојници е да ги обединува верниците а не да ги делат како и дека Република Македонија е секуларна држава, во чиј Устав Црквата е одвоена од државата, но за жал Митрополитот наместо духовни литургии на верниците им држи политички говори./У.Ј