Бројот на вакцинирани граѓани расте, колективен имунитет е можен до крајот на летото

Бројот на заболени како и на починати од последица од ковид 19 полека стивнува. Ако се вакцинираат околу 60 отсто од граѓаните, проценката е дека некаде до крајот на летото може да се постигне колективен имунитет.

Министерот за здравство Венко Филипче, во интервју за Радио Слободна Европа вели дека сите вакцини се безбедни. Нема потреба граѓаните да преферираат една наспроти друга вакцина.

Според Филипче, на 15 мај се очекува нова количина вакцини од производителот Синофарм. До крајот на мај и 500 илјади вакцини од производителот Синовак.

-Приоритет е ставен на тие што се пријавиле и затоа се направи пресек на 30 април. Сите граѓани коишто се пријавени на сајтот vakcinacija.mk, а тоа се невакцинирани близу 160 илјади, во период од две недели, значи некаде до 15 мај ќе добијат термин за вакцинација преку СМС порака или мејл со точно време и пункт каде треба да се јават“, изјави Филипче, додавајќи дека тоа значи оти и помлади ќе добиваат вакцина.

Само во текот на вчерашниот ден, вакицинирани се 11.857 граѓани. Вкупно вакцинирани граѓани во државата се 130.878. Од кои 107.979 граѓани ја примиле првата вакцина. Секојдневно расте и пријавувањето на заинтересираност помеѓу граѓаните за вакцинирање преку сајтот vakcinacija.mk. Заклучно со вчера, пријавени се вкупно 279.909 граѓани.

Вкупната бројка на Ковид-дијагностицирани лица во нашата земја од почетокот на епидемијата изнесува 154.026, бројката на оздравени пациенти е 137.962, на починати е 5.093, а бројот на активни случаи изнесува 10.971.