(фото и видео) Априлијада во Велес со повеќе од 800 деца облечени во разни креативни маски, прогласени и најдобра, најсмешна, еко и страшна маска

Повеќе од 800 дечиња во разни маски продефилираа на сцената на Амфитеатарот во Младински парк во Велес, по повод 1 април, денот на шегата. Принцези, стујардеси, полицајци, супер херои, роботи, индијанци, пуканки, лего коцки, кафемат, кола, рачно изработени еко маски, мафини, пчелки, но и по некоја страшна маска беа само дел многуте кративни првоаприлски костуми со коишто младите велешани го одбележаа празникот на шегата. Насмеани играа, се забавуваа и заеднички уживаа на топлото време на првиот ден од месец април.

Жири комисијата во состав на Сандра Танчева, Орхидеја Дукова и Катерина Чукниева ја имаше и најтешката задача, поточно да изберат најдобра индивидуална и групна маска, како и најкреативна, еко, смешна и страшна маска.

-Искрено имаме премногу дечиња коишто подеднакво се потрудиле денеска да изгледаат прекрасно. Има огромна конкуренција и стварно беше тешко да донесеме одлука кои маски ќе бидат прогласени за најдобри, најсмешни или пак најкреативни. Сакаме да додадеме дека сите маски коишто продефилираа беа преинтересни, убави и впечатливи. Но, мораме да кажеме дека уживавме во текот на целата априлијада, одговорија заедно од жири комисијата на поставеното новинарско прашање.

Градоначалникот на Општина Велес, Марко Колев, на самиот крај ги додели и дипломите на наградените маски.

Инаку, годинава учество на априлијадата земаа дечињата од ОЈУДГ „Димче Мирчев“ со сите шест објекти, учениците од ОУРД „Маца Овчарова“, учениците од ООУ „Рајко Жинзифов“ со II, III, IV, V и VI одделение, ООУ „Св. Кирил и Методиј“ со сите првачиња и вторачиња, ООУ „Панко Брашнаров“ со III одделенците како и учениците од V-в одделение, ООУ „Васил Главинов“ со I-6, II, IV, V одделение и ООУ „Блаже Конески“ со учениците од I до V одделение.

За време на програмата неколку пати со свои музички точки присутните ги забавуваа анабелките од Балетско студио „Анабела“ како и нивниот танчар Баже со неговата музичка точка „Супермен“.

Стефани Манева

фото галерија: