Општина Велес го распиша конкурсот за стипендирање на талентирани ученици и студенти

Комисијата за стипендирање на талентирани ученици и студенти на Советот на Општина Велес го распиша конкурсот за стипендирање во учебната 2023/24 година. Стипендии ќе добијат по 17 ученици и студенти. Стипендиите за талентирани ученици од II, III, IV година во средно образование изнесуваат по 2.000,00 денари додека за талентирани студенти кои запишале минимум II  година на студирање по 2.500,00 денари, месечно. Стипендиите ќе се исплаќаат за девет месеци колку што трае учебната 2023/24 година.

Право на стипендија имаат кандидатите кои се жители на Општина Велес и се државјани на Македонија , учат и студираат во училиштата и факултетите во Македонија и ги исполнуваат условите како што се редовни и одлични ученици или студенти кои во текот на студии постигнале просечен успех од 9.00 и над 9.00. Исто така имаат освоено награди на општински, регионални, државни или меѓународни натпревари од областа на науката, техниката, културата и спортот.

Заинтересираните ученици  и студенти на страницата на Општина Велес, https://veles.gov.mk/ можат да проверат кои документи се потребни за пријавување. Конкурсот е отворен до 4 декември 2023 година.

Убавка Јаневска