Се чисти снегот од патните правци во општините, информираа градоначалниците на Чашка,Стојановски и на Кавадарци,Јанчев (фото)

Поради обилните врнежи на снег,кои започнаа во текот на ноќта три екипи на ЈКП „Тополка“ со три возила од раните утрински часови излегоа на терен и започнаа со расчистување на локалните патни правци во населените места низ општина Чашка .

-Се чисти на локалните патишта кон селата Горно и Долно Јаболчиште потоа Мелница и Горно Врановци како и со една екипа во регионот Азот кон населените места Ореше, Нежилово и Папрадиште. Во текот на денешниот ден се очекуваат интензивни врнежи од снег но нашите екипи остануваат на терен се со цел да се овозможи проодност на локалните патни правци и непречено функционирање на локалното месно население,“соопшти градоначалникот Горан Стојановски.

Градоначалникот апелира до граѓаните на Општина Чашка да ја почитуваат законската обврска за задолжителна употребa на зимска опрема за движење со возила и доколку имаат потреба за итно реагирање и помош да ја побараат од задолженото лице на општинската администрација на мобилниот телефонски број 075 331 340.

Во текот на ноќта и во моментов во Кавадарци интензивни врнежи од снег. Градоначалникот Митко Јанчев соопшти дека службите задолжени за зимско одржување на патиштата од ЈП „Комуналец“ Кавадарци со осум машини и друга механизација интервенираат на терен веќе од раните утрински часови.

-Исчистени се сите патни правци кон селата под Кожувието, до ски центар Михајлово, околните села на Кавадарци, централното градско подрачје и институциите во Кавадарци, соопшти Градоначалникот Митко Јанчев.

Тој, исто така, соопшти информација за сите коишто денеска планираат да го посетат Ски центар „Михајлово“ дека поради густа магла нема да работи ски лифтот.

Убавка Јаневска