Конституирана Комисијата за унапредување на права на пациенти на велешкиот Совет, Димова избрана за претседателка

Советот на Општина Велес ја формираше Комисија за унапредување на правата на пациентите. Комисијата, согласно Законот за заштита на правата на пациентите, составена е од 11 члена кои се претставници на Советот и на граѓанскиот сектор. Поранешната судијка и петседателка на Основен суд Велес, Лидија Димова избрана е за претседателка на комисијата. Таа претставник е на граѓанскиот сектор поточно член на Управен одбор на Фондација за локален развој и демократија Фокус.

Комисијата за унапредување на правата на пациентите е формирана за да се овозможи заштита на правата на пациентот со што би се обезбедила квалитетна и континуирана здравствена заштита во согласност со тековните достигнувања во здравството и медицината, во рамките на системот на здравствена заштита и здравствено осигурување, соодветна на поединечните потреби на пациентот, со отсуство на каква било психичка и физичка злоупотреба, со целосно почитување на достоинството на неговата личност и во негов најдобар интерес.

На конститутивната седица на Комисијата во која членуваат и д-р Лилија Чолакова Дервишова и Димче Ацков, како претставници на Совет на Општина Велес, Димче Велев – претседател на Сојузот на здруженија на дијабетичари на Македонија,  Далиборка Златева од Здружение на лицата со церебрална парализа и други попречености, Македонка Икономова Давчева од Здружение за помош на пациенти болни од рак „Љубов сме“ како и останатите членови  разменија мислења и искуства и ја нагласија важноста од соработка помеѓу членовите на Комисијата во насока на подобрување на правата на пациентите.

Општина Велес, согласно законските надлежности на лесно достапно место и со цел за унапредување на правата на пациентите ќе отвори Канцеларија на Комисијата за унапредување на правата на пациентите во зграда на Општина Велес.

Убавка Јаневска