Како да ја задржите бојата и да ја обновите кожата после сончање?

Бидејќи летните денови се при крај, треба да се грижите за вашата кожа по сончањето. Без разлика дали вашата цел е да го задржите исончаниот тен или да го поправите несаканиот изглед, неопходно е да изберете соодветна нега.

Иако сите уживаме во морето, солта, сонцето, сето тоа може да предизвика оштетување на кожата. Основната заштита е за време на престојот на сонце со користење на креми со заштитен фактор кои штитат од штетното УВА и УВБ зрачење.

Доколку навистина настанале изгореници, неопходно е да се третира кожата – да се олади со млака вода или со облога и потоа да се третира со нежни антиинфламаторни креми или гел од алое вера. Погрижете се производот да не содржи алкохол или иритирачки парфеми за дополнително да не ја оштети веќе оштетената кожа.

Како да ја задржите бојата?

Доколку сте ги следеле сите инструкции и сакате само да го зачувате тенот, се препорачува интензивно да ја хидрирате кожата со нежни гел-текстури од лосиони и креми за да ја обезбедите влажноста на кожата и со тоа да го забавите губењето на бојата. Некои од најпопуларните состојки за навлажнување на кожата во моментов се хијалуронска киселина, хидролизиран колаген и слично.

Палетата на производи за после сончање е се побогата и доколку не сакате хидратантни креми и лосиони, можете да пробате некои од новитетите кои веќе добија голема популарност. Некои производи имаат текстура на јогурт и покрај тоа што ја ладат и навлажнуваат кожата, збогатени се и со путери кои исто така ја негуваат кожата и промовираат регенерација по изложување на сонце. Текстурата на јогуртот овозможува производот брзо да се апсорбира.

На пазарот се достапни и производи на база на масла кои брзо се апсорбираат кои не оставаат мрсни остатоци, а воедно ја негуваат кожата со своето хранливо дејство. Најчесто тоа е мешавина од неколку масла кои во синергија го прават најдоброто за регенерација на кожата.

Обновување на кожата одвнатре

Покрај козметичките производи, кожата можеме да ја заштитиме и одвнатре, а тоа е преку правилна исхрана и во овој случај, хидратација и пиење доволно вода. Хидратацијата е важна во секое време од годината, а и покрај сите третмани, кожата најдобро изгледа кога е здрава од внатре кон надвор. Затоа, зголемете го внесот на вода, бидејќи тоа ќе придонесе за еластичност и влажност на кожата.

Со текот на времето, и покрај сета грижа, бојата ќе избледи, а потоа можете да користите лосион кој содржи компоненти за самопотемнување. Доколку се одлучите да користите таков производ, направете пилинг пред употреба бидејќи е неопходно да се отстранат мртвите клетки од кожата. На овој начин ќе се погрижите да не се појавуваат дамки и ќе уживате во тен подолго време.