Издумани Крлевизми: „Срцето е извор на среќата. Умот прави да блика или да пресуши“
Објавено: 19 септември, 2025, во 10:05 часот
Десет нови издумани Крлевизми од велешкиот афористичар Атанас Крлевски за читателите на Дума.мк. Овој петок негов мотив е „среќата“.
-Секој е ковач на сопствената среќа, ама не во туѓа ковачница.
-Мојата среќа како мојата комшивка. Не знаеш, кога ќе ти се насмее.
-Среќата е во моите раце. Само треба да ми ги одврзат.
-Среќата ме следи цел живот. Веројатно ѝ сум сомнителен тип.
-Среќата е мисловна именка. Затоа со жена ми сум најсреќен.
-Постојано се трудам да ја расплачам мајка ми. Од среќа!
-Чекав среќата да ми падне од небото. Ми падна метеор врз главата.
-Имаме среќен брак. Јас молчам и трпам, а таа молчи и ужива.
-Срцето е извор на среќата. Умот прави да блика или да пресуши.
-Ако среќата е заразна, ќе предизвикам епидемија. Можеби ќе го спасам светот?
Афористичар Атанас Крлевски
Дума.мк
