Осмата книга на велешанката Лили Арсова посветена на зимските радости

Осмата збирка поезија за деца „Снежната убавица“ од авторката Лили Арсова беше промовирана во Градската библиотека „Гоце Делчев“ во Велес. Новата збирка е посвета на зимските радости, празничната светлина и чистата, искрена детска среќа, преточени во стихови што лесно се паметат, а долго се чувствуваат. Книгата носи метафоричен и топол наслов, а токму таква е и нејзината поетска атмосфера.

Промоторката, проф. д-р Елизабета Бандиловска, истакна дека иако зимата најчесто ја поврзуваме со студ и снег, во песните на Арсова „се сеќава нешто што не топли – радост, љубов и светлина“.

Според неа, белината што провејува низ збирката е симбол на чистота, убавина и невиност, особини што природно и припаѓаат на детската душа.

-Песните се наменети за децата, но можат да ги допрат и возрасните, нагласи Бандиловска, додавајќи дека токму во таа двојна читливост лежи нивната вредност.

Авторката Лили Арсова посочи дека збирката е свесно тематски насочена кон зимата и празниците, време кое, според неа, е недоволно застапено во домашната детска поезија. Токму таа празнина била мотив да се создаде книга што ќе ги следи детските возбуди околу снегот, празниците и заедништвото.

Промоцијата доби дополнителна емоција со музичката изведба на песната „Светол ден божиќен“ во интерпретација на младата и талентирана Илина Цветковска, додека стихови од книгата рецитираа Леа Ивановска и Александра Ставреска.

„Снежната убавица“ е издание на Клубот на писатели „Коста Солев Рацин“ од Велес, а книгата е богато илустрирана со слики во боја од Вера Самарјанин, кои визуелно ја надополнуваат поетската зимска приказна.

Стефани Манева