Вакцинацијата на децата против ковид не е кривично дело, туку слободен избор на родителот

Во постот се изнесени повеќе неточни тврдења. Децата најчесто полесно го поминуваат ковид-19, но новата делта варијанта на коронавирусот покажа дека нема правила. Во земјава од ковид починаа и млади лица, на возраст од 15, 16 и 17 години. Во однос на тврдењето дека ризикот од сезонски грип е повисок од ризикот за ковид, според официјалните информации на ИЈЗ во сезоната 2020-2021, вкупниот број на заболени од сезонски грип изнесувал 539, што е за 92,5 проценти помалку во споредба со истиот период минатата сезона и 94,5 проценти помалку во однос на типичната сезонска крива. Исто така, не е вистина дека вакцините против ковид-19 се експериментални. Тие ги поминаа сите потребни фази на клиничките испитувања. Обемното тестирање и мониторирањето покажа дека овие вакцини се безбедни и ефикасни

Рецензираме пост на Фејсбук којшто се однесува на вакцинацијата против ковид-19 на децата над 12 години. Во постот се тврди дека „доколку го вакцинирате вашето дете против ковид-19 вршите кривично дело, дека ризикот од сезонски грип е поголем од ризикот за ковид, дека вакцината е експериментална, како и дека вакцината против ковид има 50 пати поголема веројатност да убие, отколку самиот вирус“.

Овие изнесени тврдења не се вистинити.

Вакцинирањето на вашето дете со вакцина против ковид не претставува кривично дело. Во Република Северна Македонија, вакцинацијата против ковид не е задолжителна, а за децата е неопходна  писмена согласност од родителот. Родителот со своите деца може по сопствена волја да се појави директно на пунктовите за вакцинација, а во здравствените домови достапни се и педијатри за советување. Вакцинацијата на децата не само што не е кривично дело туку е и слободна волја на родителот и негово право. И покрај тоа што се тврди во постот дека децата полесно го поминуваат ковид, што е најчесто така, но новата делта варијанта на коронавирусот покажа дека нема правила. Во земјава од ковид починаа и млади лица, на возраст од 15, 16 и 17 години. Во ГОБ 8 Септември еден месец со тешка форма на ковид е хоспитализирано седумнаесетгодишно девојче.

Овие случаи покажуваат дека децата, исто така, може да завршат фатално од ковид.

Во постот се тврди дека ризикот од сезонски грип е повисок од ризикот за ковид, без притоа да се понуди барем еден медицински или статистички доказ. Делта варијантата на коронавирусот е многу заразна, за 70 проценти позаразна од првичниот див сој на коронавирусот. Не може да знаеме каква ќе биде состојбата со сезонскиот грип годинава, но можеме да ги погледнеме информациите од минатата година.

Тогаш, исто така, имаше пандемија на ковид. Според официјалните информации на Институтот за јавно здравје во сезоната 2020-2021, вкупниот број на заболени од сезонски грип изнесувал 539, што е за 92,5 проценти помалку во споредба со истиот период минатата сезона и 94,5 проценти помалку во однос на типичната сезонска крива.

Таква беше состојбата лани, грипот не беше честа појава и откако се појави ковид, бројот на случаи на грип опадна драстично.

Не е точно ниту тврдењето  во постот дека вакцината против ковид е експериментална.

Вакцините против ковид-19 не се експериментални. Тие ги поминаа сите потребни фази на клиничките испитувања. Обемното тестирање и мониторирањето покажа дека овие вакцини се безбедни и ефикасни. Целта на секоја вакцина против ковид–19е да го подготви имунолошкиот систем на вашето тело да произведува антитела кои ќе се борат против инфекцијата, односно антитела кои можат да го нападнат токму вирусот САРС-КоВ-2. За да се постигне оваа цел, при обработката на вакцината се користат различни научни методи.

Научните студии покажуваат дека вакцините против ковид-19 се ефикасни во спречувањето на инфекцијата со ковид-19. Примањето на која било вакцина ги ублажува симптомите на вирусот и во случаите кога вакцинираното лице се разболува со ковид–19. Вакцините против коронавирусот го учат имунолошкиот систем како да го препознае и да се бори против вирусот што предизвикува ковид-19.

На официјалната веб-страница на „Фајзер“, каде што има и низа соопштенија со датуми од коишто може да се види кога почнала и како напредувала соработка со „БионТек“ која резултираше со создавање на вакцина против ковид. На 9 април 2020 година компаниите информираат за нивниот напредок. На 22 април 2020 година „Фајзер“ и „Бионтек“, повторно официјално преку соопштение, објавено на нивната официјална веб-страница, соопштуваат дека добиле регулаторна дозвола од германските власти да почнат клинички тестирања на четири кандидати за вакцина ковид-19. На 29 април 2020 година „Фајзер“ и „Бионтек“  информираат дека одредиле колкава треба да биде дозата на вакцината. На 5 мај 2020 година како дел од клиничкото испитување се дадени првите вакцини во САД на учесници во клиничката студија. На 1 јули се регистрирани првите позитивни исходи од таквото давање на вакцините. Потоа следуваат позитивни исходи од вакцината во Германија во сите три фази, понатаму добивања одобренија од Американската агенција за лекови и од Европската Унија, а останатото со оваа вакцина е историја, односно таа веќе е дистрибуирана насекаде во светот за со неа масовно да се вакцинира населението на глобално ниво. Компаниите „Фајзер“ и „Бионтек“ сега разгледуваат како нивната вакцина ќе се одрази на мутациите на ковид-19.

Ова е кратката историја на создавањето на вакцината против ковид-19 на „Фајзер“ и „Бионтек“ која покажува дека вакцината поминала пат на повеќе одобренија клинички студии и не е експеримент.

Вакцините против ковид-19 беа развиени брзо во споредба со претходните вакцини затоа што научници, лекари и владини агенции низ целиот свет вложија огромни ресурси за да ја намалат бирократијата и да ги објават резултатите штом беа достапни.

И последното лажно тврдење во постот штого рецензираме е дека вакцината против ковид има 50 проценти поголема веројатност да убие отколку самиот вирус. Ова тврдење е апсолутно неточно.

Според официјалната страница за вакцинација, вакцината на „АстраЗенека“ во клиничките студии има докажана ефикасност од 63.09 отсто за превенција на инфекција со САРС-Ков2. Резултатите од реалната пракса се охрабрувачки, само по првата доза 85 проценти се намалува ризикот за хоспитализација или тешка форма на болеста, велат на веб-страницата за вакцинација на Министерството за здравство.

И за „Фајзер“ клиничките студии покажаа висока ефикасност до 94 проценти превенција од САРС-Ков2 инфекција. Податоците од вакцинацијата ширум светот ја потврдуваат ефикасноста од клиничките студии.

Министерот за здравство Венко Филипче во септември изјави дека вакцините за 20 пати ја намалуваат шансата за смртен исход.

Министерството за здравство објавува анализи на тоа дали починатите од ковид во земјава биле вакцинирани или невакцинирани. Според последната таква анализа од 4 ноември 2021 година, во периодот од 6 август до 4 ноември на територијата на државата 48.955 граѓани се позитивни на ковид, а од нив целосно вакцинирани биле 28 проценти односно 13.886 лица.

Процентот на хоспитализирани лица кои се невакцинирани изнесува 78 проценти, додека 22 проценти од сите моментално хоспитализирани пациенти се целосно вакцинирани. Смртноста кај невакцинираните е драстично поголема, покажува анализата. Во период од 6 август до 4 ноември на територија на државата починале 1.688 пациенти со Ковид 19, 1.376 пациенти од починатите, односно 82 проценти не биле вакцинирани, а 18 проценти односно 312 примиле вакцина. Според анализите починатите имале повеќе комбинирани хронични заболувања. Пациентите биле вакцинирани со сите типови вакцини кои ги има на располагање кај нас.Министерството за здравство укажува на важноста на вакцинација, секоја вакцина која ја имаме на располагање е безбедна. Апелираме граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКов2, велат од Министерството за здравство.

Од анализата евидентно е дека најголем дел од починатите не се вакцинирани. Ковид кај невакцинираните бил фатален во 1.376 случаи!

Поради сите горенаведени факти оценуваме дека не е вистина дека вакцинација на дете е кривично дело, дека вакцините се експериментални, дека смртноста од вакцината е повисока од онаа од ковид и дека ризикот од сезонски грип е повисок од ризикот од ковид.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар