По три годишна изградба покриениот градски пазар ќе се отвори на денот на град Велес – „9 Ноември“

Градскиот пазар во Велес по три години свечено ќе биде отворен на 9-ти Ноември, четврток во 12:00 часот, на денот на Општина Велес. Новиот градски пазар се протега на површина од 4171.93 метри квадратни од кои 2218.72 метри квадратни се наменети за продажба на произовди.

По повод 79 години слободен Велес, 9-ти Ноември ќе биде одбележан со низа настани распоредени во седум денови.

Програмата подготвена од страна на Општина Велес започнува во недела, на 5 ноември со крводарителска акција којашто ќе се одржи во велешкиот театар „Ј.Х.К Џинот“ од 09:00 до 16:00 часот, организирана од страна на Мото клуб „Носачи на крстот“ , општината и Црвен крст Велес.

Во вторник, на 7 ноември, со почеток во 17:00 часот ќе биде одигран меѓународен турнир на ракометни ветерани „Велес 2023“ во Спортската сала „Гемиџии“. Овој натпревар е организиран од Здружение на спортски ветерани Велес со поддршка на општината. Наредниот ден, на 8 ноември, во Ликовен салон ќе се одржи промоција на монографијата „100 години Велес – историја на поштенски картички“ од Виктор Габер и Зоран Стрезоски.

На 9-ти Ноември, во Кабинетот на градоначалникот на Општина Велес ќе има прием на делегација на Сојузот на борци од НОВ и АФВ, по што ќе следи положување на цвеќе во Младински парк и Спомен Костурница.

Свечената академија по повод 9-ти Ноември – ден на Општина Велес ќе се одржи во театар „Ј.Х.К Џинот“ со почеток во 19:00 часот. За време на настанот ќе бидат доделени Деветтоноемвриски награди и признанија, награда за најстудент „Ѓорѓи Шоптрајанов“  и награда за животно дело „Гемиџии“. Во чест на добитниците концерт ќе одржи Камерен оркестар на Битола.

На 10 оември, петок, со почеток во 10:00 часот започнуваат 56 детски рацинови средби со дефиле „Цветен пат за Рацин“ организирано од страна на Општина Велес и МДПС „Премиера“. Следниот ден, на 11 ноември, свечено ќе бидат доделени наградите на детските Рацинови средби.

На 12 ноември, недела, со почеток во 11:00 часот ќе се одржи деветтоноемвриската трка „Велес трча“ организирана од ЗГ Атлетски клуб „Борец“.

Стефани Манева