Предизвикан пожар во контејнер во Велес, ЈКП „Дервен“ со апел до граѓаните

Отворен контејнер за смет од 5м3 на улица Васил Главинов во Велес, во текот на вчерашниот ден бил запален од страна на несовесен граѓанин при што настанала и експлозија на плинска боца којашто била фрлена во внатрешноста на контејнерот. Пожарот бил пријавен во Територијална противпожарна единица Велес, веднаш бил локализиран и нема повредени лица.

– Ги замолуваме граѓаните, заради своја и безбедност на другите да не фрлаат во контејнерите пепел од огништата, затоа што ќе се запали сметот што е во нив, а во сметот од домаќинствата често има и предмети кои во контакт со оган може да предизвикаат опасност по живот, стои во соопштението на ЈКП „Дервен“ објавено на нивната фејсбук страна.

Ова е прв случај на запален контејнер оваа година, во текот на претходната во неколку наврати беа запалени и уништени неколку подземни контејнери во Велес.  

Стефани Манева