Во ООУ „Методи Митевски – Брицо“ во Лозово отворена нова библиотека

Нова модерна и современа библиотека е отворена во основното општинско училиште „Методи Митевски – Брицо“ во Лозово. Просториите коишто не се користеле подолго време во училиштето, сега се трансформирани во место кадешто учениците ќе сакаат да го поминуваат своето слободно време.

-Со добро разработена проектна идеја, со многу труд, знаење, професионализам, посветеност, истрајност, трпение, со тимска работа, со примена на сето искуство и со поддршка од Мировниот корпус и нивниот волонтер во нашето училиште Judith Aguayo, како и USAID North Macedonia успеавме да го финализираме овој проект во нашиот најубав училишен простор. Покрај книгите што беа донирани од заедницата, посебна благодарност би сакал да упатам и до Менаџерскиот тим при Национална и универзитетска библиотека „Св. Климент Охридски“ кои на мое барање, несебично со своја донација помогнаа да го збогатиме фондот на книги кои ќе бидат на располагање на сите љубители кои сакаат да уживаат во пишаниот збор, рече Градоначалникот на Општина Лозово Бошко Цветковски.

Сега учениците имаат простор кадешто ќе може да работат индивидуално или пак во група. Во овие простории, после училиште учениците ќе може да посетуваат и клуб за книги, за англиски јазик или да добиваат дополнителна поддршка од своите наставници.

Градоналачникот Бошковски додаде дека во наредниот период интензивно ќе работат за имплементација на систем за електронска библиотека.

-Во периодот кој следи ќе работиме и на линковски конекција за поврзување на системот за Е-КНИГА при Националната Библиотека со нашата Е-библиотека каде граѓаните ќе имаат можност да пристапат по електронски пат до многубројна литература, додаде Бошковски.

Стефани Манева