Поповски: Многу свежо утро во Македонија, доаѓа зимски ладен бран на Балканот со снег! 

Во овие утрински часови времето во  Македонија е значително свежо и претежно облачно  а локално се забележуваат и повремени послаби врнежи од дожд. Најмногу дожд во изминатите 24 часа наврна во Крива Паланка, 14 литри на метар квадратен дожд.

Најсвежо утрово е во Лазарополе со измерени 6 степени.

„Во четврток и во петок, 2 и 3 октомври, Македонија но и целиот регион ќе биде зафатен од зимски ладен бран од исток и од североисток, односно од Русија. Ќе дојде до формирање на секундарен циклон над Медитеранот и тој ќе услови да имаме многу обилни врнежи од дожд кои полека ќе преминуваат во снег на повисоките места  и на планините каде ќе дојде до формирање на првата  посериозна снежна покривка за оваа сезона.

Според она што можам да го кажам во моментов  и според најновите излези на прогностичките материјали, на 2  и на 3 октомври снежната граница во нашата Македонија ќе се спушти дури и на помала надморска височина (локално под 1000 метри).

Снег на 2  и на 3 октомври можеме да очекуваме и во повисоките населени места, па дури и во дел од градовите во западните  и во северните предели на државата.

Следува целосна  и детална метео анализа токму околу овој зимски бран во првите денови од месец октомври,“ соопшти метеопрогнозерот Славчо Поповски.

Дума.мк