Велешани ги посетуваат јавните тоалети во градот
Ги има само на две локации во централното градско подрачје и се бесплатни. Оние на улица Илинденска, во центарот на градот во близина на мостот Гемиџии се најискористените, велат од Јавното комунално претпријатие Дервен. Според граѓаните од блиската кафеана и продавници, дневно во нив влегуваат и по стотина граѓани.
Вработени на јавното претпријатие редовно ја одржуваат хигиената во нив, а тие се отворени секој ден од 08 до 20 часот и в недела од 08 до 16 часот. Дека граѓаните ги користат денеска се уверивме и ние. Десеттина велешани влегоа во нив.
– Чисто е, хигиената добро се одржува. Овој овде на улица Илинденска би можел да се придотера малку додека тоалетите на пазариште се понови, рече граѓанин.
– Јас често го користам бидејки моето работно место е тука, во блиските киосци и во нив нема санитарен јазол. За хигиената немам никаква забелешка а за изгледот мислам дека не е на одмет едно реновирање. Морам да кажам дека тоа што се бесплатни и што се чисти придонесува да ги користиме сите ние кои работиме во близина, рече граѓанин.
Во функција се и јавните тоалети кај Градскиот пазар, но се далеку од стандардните услови за посетителите. Не работат тоалетите кои се наоѓаат под малото паркче кај Градскиот саат. Надлежните ги направија но не ги отворија, иако граѓаните велат дека е потребно да се стават во функција.
– Пренесете дека има потреба и од нив. Видете вака неотворени а некој ги искршил стаклата на прозорците. Друга ситуација ќе биде кога тука ке има човек и нема да им дозволува на несовесните граѓани да прават што сакаат, рече граѓанин.
Во другите делови на градот нема јавни тоалети. Од локалната самоуправа велат дека се бараат најфрекфентните места на кои ќе се градат вакви објекти.
„Нашите архитекти бараат најсоодветни локации, онаму каде што има најголема фрекфенција на луѓе и откако ќе се утврдат ќе се пристапи кон градење. Оние што беа во комплексот на објектот на Офицерскиот дом, ги отстранивме бидејќи не беа функционални и ако ги оставевме ќе не чинеше многу повеќе во средување на тој комплекс, рече Славчо Чадиев, градоначалник на Велес.
Општината нема надлежност врз јавните тоалети на железничката и на автобуската станица во Велес. Првите се во катастрофална состојба бидејќи многу одамна таму никој не направил интервенции иако станува збор за јавна институција со огромна фрекфенција на луѓе. Сепак, можеби и тие ќе дојдат на ред за реновирање, кога ќе започне реконструкцијата на железничката станица, која министерството за транспорт и врски неодамна ја најави./Д.С