Скопски Апелациски суд ја намали за 10 години затворската казна на велешанецот Николов
Постапувајќи по жалбата на осудениот Ангелче Николов од Велес, скопскиот Апелациски суд, ја намали изречената затворска казна од 18 на 8 години. Одлуката на повисокиот суд е донесена на почетокот на месец, јули, годинава, потврди за Дума.мк портпаролката на Основен суд Велес Габриела Гајдова. Оваа судијка беше претседател на петчлениот Судски совет којшто ја донесе првичната пресуда во Основен суд Велес.
Со првичната пресуда обвинетиот велешанец Ангелче Николов доби затворска казна во висна од 18 години за две кривични дела, „Тешки дела против безбедноста на луѓето“ и за „Неукажување помош на лице повредено во сообраќајна незгода“ во сообраќајката што се случи во Велес на 17 декември, минатата година, кога беше прегазена 11-годишната Магдалена Иванова од Велес.
Во првичната пресуда, Основен суд Велес, на Ангелче Николов му изрече 17 години затвор за првото кривично дело и една година затвор за второто кривично дело, поточно единствена казна со вкупно 18 години. Во пресудата тогаш беше констатирано дека Николов двете дела ги сторил со умисла, возел под дејство на алкохол, двојно побрзо од дозволеното, го усмртил 11 годишното девојче на пешачки премин, не застанал да им помогне на жртвите, поточно на Иванова и на нејзината мајка и со несмалена брзина продолжил да вози во правец кон населбата Превалец. По неколкудневното криење од органите на прогон Ангелче Николов се предаде на полицијата.
Убавка Јаневска