Издумани Крлевизми: „Ако вашиот углед е скапоцен, тогаш не мислите дека туѓиот е за распродажба“
Објавено: 3 октомври, 2025, во 19:03 часот
Дваесет нови Издумани Крлевизми од велешкиот афористичар Атанас Крлевски за читателите на Дума.мк.
-Ако вашиот углед е скапоцен, тогаш не мислите дека туѓиот е за распродажба.
-Му го урнаа угледот. Бил дива градба.
-Не оставам впечаток, но оставам печат.
-За никаде е! Сосема доволно да го користат за секаде.
-Си го отсвирив своето, па сите си играат со мене.
-Конечно нешто направи… будала од себе.
-Ќе се спуштам на нивно ниво за да можам да им ја удрам клоцата.
-Еден е најмалку двајца, а ние од двајца правиме ниеден.
-Кога видоа дека сум добро поткован, упорни се да ме насамарат.
-Го дискредитираа за да не го акредитираат.
-Наша специјалност: добро поткованите да ги правиме магариња.
-Јас сум загубен случај, а не ме примаат и во Бирото за загубени работи.
-Имам свои ставови. Најчесто, ползам!
-Не дозволувам да ме вреднуваат невредни. Алергичен сум на лажни авторитети.
-Нема нумизматичка вредност. Тој е само паричка за поткусурување.
-На рајската птица не и доликува да заврши во пеколот.
-Сакам да ги откупам сите погрешни слики за мене. Никој не ги продава.
-Во некои средини лесно е да станеш некој и нешто. Посебно ако не те бива за ништо.
-Секаде служам за пример. Негативен!
-Не валкајте си го името! На надгобната плоча ќе ви пишува: Безимен.
Афористичар Атанас Крлевски
Дума.мк
