Путин со дезинфо наратив – Западот ја почна војната во Украина, Русија само се бранеше

Најновиот говор на рускиот претседател Владимир Путин беше искористен да се пласира еден стар руски наратив околу Украина – Русија само се бранеше. Овој наратив беше обновен и засилен со два-три поднаративи, а беа споменати и „нацизмот“ и „русофобијата“. Овој дезинфо наратив за Западот како главен виновник е и варијација на темата „Украина е главен виновник“, што Путин ја употреби во јануари говорејќи во Санкт Петербург

Говорот на рускиот претседател Владимир Путин на само два дена пред годишнината на руската агресија врз Украина беше широко пренесен во медиумскиoт простор во С. Македонија, поради две причини. Првата е значењето на датумот, говорникот и пораките и втората поради интересот и на медиумите и интересот на публиката за она што се случува околу Украина.

Уште во првична анализа може да се каже дека во говорот Путин употреби познати два-три руски наративи околу кои се гради дезинформациската стратегија на руската надворешна политика, но овој пат главен беше наративот кој служи за оправдање, односно дека Западот, а не Русија се виновни за војната во Украина:

„Русија направи сè што можеше за да избегне војна, но Украина, поддржана од Западот, планираше да го нападне Крим“, рече Путин. Крим е украински полуостров, што Русија го анектираше во 2014 година.

„Народот во Украина самиот стана заложник на режимот во Киев и неговите западни господари, кои ја окупираа оваа земја во политичка, воена и економска смисла“, рече Путин, објави РСЕ на македонски јазик.

Ова се потврдува и во друг дел од говорот, пренесен од друг медиум:

„На крајот на 2021 година официјално побаравме безбедност од САД и Европа, но бевме одбиени. Заканата растеше и до февруари 2022 година сè беше подготвено за воени акции во Донбас. Сето ова беше спротивно на документите прифатени од Советот за безбедност на ОН. Сакам да повторам – тие ја започнаа војната, а ние употребивме сила за да ја запреме“ – рече Путин обраќајќи се пред пратениците на руската Дума, пренесува 360 Степени.

Она што е ново во говорот околу овој наратив, а со цел да биде поуверлив, е тврдењето дека Украина уште пред агресијата или специјалната воена операција како што ја нарекува официјална Москва, договорила испораки на огромни количества оружје од Западот.

„Направивме се за да го решиме конфликтот со режимот во Киев на мирен начин, но зад нашиот грб се подготвуваше сосема поинакво сценарио. Тврдењата на западните лидери беа лажни, тие купуваа време и замижуваа пред политичките убиства и репресија на режимот во Киев во Донбас“, рече Путин.

„Пред специјалната воена операција, Киев договори испорака на тешка воена опрема, противвоздушна одбрана, авиони и нуклеарно оружје“, рече тој, пренесува А1.Он.мк.

Ова е новината, а за нејзе само неколку денови пред говорот на Путин соопштија руски безбедносни служби преку официјални канали. Очигледно, информацијата за која не е исклучено да е вистината ама треба да се гледа во контекст на сите информации што ги имале и Киев и западните сојузници во текот на целата 2021 година, а особено од есента со распоредувањето на руските трупи околу границите на Украина – е употребена за засилување на рускиот дезинформациски наратив дека Русија не е виновна за војната, туку дека била вовлечена во нејзе. Исто така овој дезинфо наратив за Западот како главен виновник е варијација на тема како Украина главен виновник, што Путин ја употреби пред еден месец говорејќи во Санкт Петербург.

Употребата на Југославија и Сирија во говорот на Путин

Вториот наратив во говорот на рускиот претседател, а кој се ползува исто така за засилување на главниот – Западот е виновен, е употребата на т.н. „вотабаутизам“ (what about that). Имено Путин потсети на однесувањето на Западот и во поблиското и во подалечното минато:

„Кога Русија искрено се обидуваше да најде мирно решение, тие одиграа валкана игра. Нивните одвратни лаги и лицемерие беа видени во Југославија и Сирија“, рече Путин за западните земји, а потоа додаде: „Излегува дека тие ги третираат своите луѓето на тој начин, зборувајќи ги лажеа за мировните договори во Донбас. Имаше целосни лаги. Ние инсистиравме да ги заштитиме нашите сопствени интереси“.

„Ниту една земја нема толку воени бази како САД низ светот. Целиот свет е покриен со нивните бази, тие имаат стотици од нив“, рече Путин, додавајќи дека Русија бара безбедносни гаранции. „Тие ги одбија нашите барања и беше јасно дека заканата расте. До февруари минатата година се беше подготвено за воена акција во Донбас. Сакам да повторам – тие ја започнаа војната и ние употребивме сила за да ја спречиме“, пренесува А1.Он.мк.

Одново „Нацистичка Украина“

Во третиот поглавен наратив што може да се забележи во првичната анализа е употребата на нацистичкото минато на Украина, но и на вината на Западот поради „русофобијата“:

„Западот инвестира трилиони долари во војни ширум светот. Тие користат зборови како демократија и вредности и го одвлекуваат вниманието од растечките економски проблеми во нивните земји. Сакам да ве потсетам дека Западот го овозможи развојот на нацистичка Германија. Тие сакаат да не одвојат од нашата историска територија. Тие го поддржаа пучот во 2014 година. Дури ни кажаа колку пари потрошиле за тоа. Идеолошката основа на таквите потези е русофобијата“, рече тој.

Тој тврди дека украинската армија има нацистички ознаки на нивните тенкови, додавајќи: „Тие тоа не го ни кријат. Не им е грижа затоа што се обидуваат да се борат против нас, против Русија. Тие сакаат да искористат сè, и терористи и Нацистите, па дури и самиот ѓавол, против Русија,“ пренесува А1.Он.мк.

Суспендирање од СТАРТ

Покрај употребата на овие наративи, рускиот претседател сосема на крај од говорот соопшти дека Русија го суспендира учеството во  договорот за контрола на нуклеарното оружје(СТАРТ), наведувајќи одново дека за тоа е виновен Западот:

„Побараа и контрола на нашите нуклеарни постројки. Не знам како да го наречам ова освен целосна глупост“, рече Путин.

„Тие не ни дозволуваат да ги проверуваме објектите и ги отфрлаат нашите напори за проценка на целните објекти. Нивната цел е стратешки да не поразат и сакаат да влезат во нашите воени објекти“, рече Путин, пренесе „Слободен печат“.

Дел од главните наративи на говорот на Путин можат да се најдат во текот на февруари во дезинформациите што ги пласираше Дмитри Медведев (наративот дека Украина е нацистичка земја, а дека европските демократиии се „русофоби“) или за „русофобијата“ и „западниот нацизам“ изразен преку настапот на Урсула фон дер Лајен, а кажани од шефот на дипломатијата Сергеј Лавров уште на почетокот на февруари.

Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар.