„Еко креатори“ ја разбуди хуманоста кај велешани – висок одзив на акцијата за донирање облека
Објавено: 14 мај, 2026, во 15:06 часот
Граѓани, ученици и млади од Велес уште еднаш покажаа дека хуманоста и грижата за животната средина се вредна човечка одлика. Сите со голем интерес и позитивна енергија, се вклучија во акцијата „Еко креатори“, организирана од Младински центар Велес.
Вчера 13 и денеска 14 мај, просторија 2 на Младински центар, беше исполнета со донации од облека и обувки кои граѓаните повеќе не ги користат и подготвено ги предадоа за повторна употреба. Донаторите со голема грижа и одговорност ги носеа донациите уредно спакувани и распоредени, покажувајќи високо ниво на еколошка култура и хуманост.
Младинскиот работник Стефани Манева вели дека е задоволна од интересот и одзивот на граѓаните.
„Задоволни сме од одзивот на акцијата. Граѓаните навистина одговорно ги носат облеката и обувките – чисти, средени и подготвени за оние на кои им се најпотребни. Очекуваме донации и во наредните денови, бидејќи дел од граѓаните веќе се најавија дека дополнително ќе се вклучат“, додаде Манева.
По завршувањето на акцијата, следува процес на селекција и сортирање на донираната облека според големина, пол и потреби, по што донациите ќе бидат доставени до семејства и лица од социјално ранливи категории.
Со ваквите иницијативи, младите и граѓаните уште еднаш покажаа дека малите хумани дела можат да создадат големи позитивни промени во локалната заедница за заштита на животната средина.
Убавка Јаневска
