(фото и видео) Во Велес одбележани 80 години од Денот на победата над фашизмот
Во Спомен-костурницата во Велес, денеска, свечено беа одбележани 80 години од Денот на победата над фашизмот – денот кога беше означен крајот на Втората светска војна и победата на слободољубивите народи над најмрачната идеологија во современата историја.
Свеченоста започна со интонирање на химната на Република Македонија и на градот Велес и во воведното обраќање на почетокот на настанот беше потенцирано дека Велес отсекогаш бил град со длабоко вкоренето револуционерно минато и чувство за слобода.
-Нашиот Велес е симбол на борбата, град во чии улици е впишана историјата со крвта на хероите. Спомен-костурницата, во облик на скршен шлем – симбол на паднатиот непријател, стои високо над градот како чувар на слободата чувајќи ги моштите на паднатите борци и жртви на фашизмот вградени во темелот на слободата, беше нагласено во говорот.
Во симболот на непокорот градоначалникот Марко Колев се обрати пред присутните и порача:„Смрт на фашизмот, слобода на народот. Да живее слободен Велес и слободна Македонија“.
Присутни на настанот покрај Градоначалникот на Општина Велес Марко Колев, беа и претставници на Армијата на Република Македонија, советници од Советот на Општина Велес, членови на Сојузот на борци, семејства на загинатите борци, директори и наставници од образовни институции, како и бројни граѓански здруженија.
Сите присутните со свежо цвеќе се поклонија пред бистата во Костурницата, оддавајќи им почит на паднатите борци и жртвите на фашизмот.
Настанот заврши со пригоден музички перформанс на велешаните Охридеа Дукова и Сашко Костов, кои со своите изведби му дадоа свечен и достоинствен крај на одбележувањето на овој значаен историски ден.
Денешниот настан е потсетник дека Велес не заборава – туку гордо го чува и пренесува сеќавањето за слободата како највисока човечка вредност.
Стефани Манева
Фото галерија:
Поврзано:
