Конституиран Советот на Општина Велес, без избор на Претседател (ФОТО)
Со верификација на мандатите на 22 или еден помалку од вкупниот број на членови на Советот, денеска, се одржа конститутивната седница на Светот на Општина Велес. Седницата започна со обраќањето на досегашниот Претседател, Кирил Гајдов кој по излегувањето на говорницата, во големата сала на општината, пред присутните Градоначалник Марко Колев и членови на Совет соопшти дека конститутивната седница е закажана во законски утврдениот рок од 20 дена по завршувањето на изборите.
-Предлагам најстариот член на Советот на Општина Велес, колегата Коста Нојков, да продолжи со претседавањето, додаде Гајдов.
Со соопштување на присутниот број од 22 членови,еден помалку од вкупниот број, претседавачот Коста Нојков од советничката група на Коалицијата предводена од ВМРО ДПМНЕ констатираше дека Советот може да ја одржи седницата и полноправно да одлучува.
-Најнапред дозволете ми да го поздравам присуството на медиумите, присутниот градоначалник Марко Колев и присутните советници на оваа седница. За денешната седница е предложен следниот Дневен ред со прва точка Избор на претседател и членови на Верификациона комисија, под точка два Извештај на Верификациона комисија за верификација на мандатите на членовите на Советот на Општина Велес и точка три Верификација на мандатите каде спаѓа полагање и потпишување на Свечена изјава на членовите на Советот на Општина Велес, додаде Нојков.
Во материјалната расправа по предложениот Дневен ред збор зема Марјанчо Николов којшто од лично и име на советничката група на опозициската СДСМ им го честита изборот на советниците, на градоначалникот и посака успешна работа.
-Почитуван Претседавач, пракса било досега на конститутивната седница да има точка во дневниот ред и за избор на Претседател. Ме интересира зошто таква точка не е поставена поради тоа што сте во период кога ќе следат важни точки за работата на Советот како што се одбележување на денот на градот Велес или ослободувањето меѓутоа и носењето на Буџет, на Програми за работа на Општина Велес. Би било законски исправно по оваа конститутивна седница со Советот да раководи Претседател што ќе го избере мнозинството на советници од овој состав на Советот. Предлагам да се стави точката за избор на Претседател на денешниот дневен ред, да се избере бидејќи сепоставува прашањето кој ќе ги потпише актите што ќе ги донесе Советот, додаде Николов.
Претседавачот Коста Нојков го стави на гласање предлогот за ставање на дневен ред на точката за Избор на Претседател на Совет на Општина Велес на советникот Марјанчо Николов. Изјаснувањето помина само со пребројување на подигнати два прста на присутните кои гласаа „За“ но не и советниците кои беа „Против“ или “Воздржани“.
Претседавачот Нојков констатираше дека предлогот го нема мнозинството за да се стави точката Избор на Претседател на дневниот ред на седницата и го стави на гласање предложениот Дневен ред на гласање. Потоа констатирајки дека сите 22 членови на Советот на Општина Велес гласаа„За“, Нојков, констатираше дека дневниот ред е прифатен.
За Претседател беше предложен и избран Коста Нојков додека за двајца членови на Верификационата комисија беа предложини и избрани Дејан Палашев и Кирил Гајдов.
По дадената пауза, претседавачот Коста Нојков поднесе извештај по разгледаните Уверенија од Општинската изборна комисија и констатираше дека нивната лична идентификација соодветствува по што соопшти дека на седницата по поднесена документација и од оправдани причини не присуствува членот на Советот Нада Јованова. Верификационата комисија не го верификуваше мандатот на Јованова на денешната туку го одложи за следна седница на која Јованова ќе присуствува. Потоа беа верификувани мандатите на членовите на Советот на Општина Велес:
- Абрашев Димитар
- Андреева Менка
- Атанасовска Весна
- Бачевац Менсур
- Гајдов Кирил
- Димески Драган
- Ефремова Катерина
- Јаковлевски Тодор
- Јаневски Даниел
- Лазаровска Прличкова Пандорка
- Лазов Кирил
- Љутков Зоран
- Митревска Ангелеска Елизабета
- Муаремовки Невзад
- Николов Маријанчо
- Нојков Коста
- Палашев Деан
- Петрушевска Николова Ружица
- Ристовска Темелкова Милица
- Смилев Игор
- Стојанов Игор
- Урумова Маргица
Членовите на Советот на Општина Велес ги прифатија Извештајот и Одлуката на Верификационата комисија со коишто мандатот на новиот состав на Советот започнува од денеска, 4 ноември и ќе трае во наредните четири години.
Потоа членовите на Советот на Општина Велес дадоа Свечена изјава дека совесно и одговорно ќе ги извршуваат правата и должностите притоа почитувајќи ги прописите и законите како и дека ќе го штитат уставот поредок на Република Северна Македонија. Но поголем дел од советниците кај името на државата изговорија: „Република Македонија“.
Убавка Јаневска
Поврзано:
