Наградени иновациите на ученици од Неготино
Објавено: 22 октомври, 2013, во 14:51 часот
Ученици од Неготино ги покажаа своите иновативни способности за што добија и вредни награди на младинското креативно творештво на саемот “Макинова 2013”, кој се одржа во организација на Сојузот на пронаоѓачи и автори на технички унапредувања на Македонија-СПАТУМ. , информираше денес претседателот на Здружението на граѓани “Ековита” од Неготино, Сашко Тодоров.
-Седмоодделенецот Филип Пушкинов со експонатот “Хидрауличен багер” освои еден златен медал, две златни плакети и парична награда. Кристина Тодорова, средношколка од прва година во средното општинско училиште “Свети Кирил и Методиј” освои златен медал за експонатот “Производство на храна од инсекти”. Раде Коцев доби златен медал за експонатот “Рециклажа на отпад од фарма”, а сребрен медал за експонатот “Еколошка рам пумпа” доби Мите Мелов, двајцата од трета година во истото средно училиште. Сите четворица добија и пофалници за млади иноватори конструктори како и годишна претплата на списанието за наука и техника “Емитер”, рече Сашко Тодоров, претседател на Здружението на граѓани „Еко Вита“ од Неготино.
Бронзен медал и парична награда за млад иноватор од Друштвото за заштита на интелектуална сопственост Берин Скопје за експонатот “Конвексно огледало-соларен шпорет” доби Ѓорѓи Јованов, ученик во трета година во “Свети Кирил и Методиј”.
На саемот учествуваа 31 ученик од цела Македонија со свои проекти.
“Ековита” даде техничка поддршка за реализација на наградените проекти./А.Д
