Петрушева Савова: Непотребно е покачување на цената од 1.490 денари на 1.990 денари за престој на деца во ОЈУДГ „Димче Мирчев“

Зголемувањето на надоместокот за престој на децата во ОЈУДГ „Димче Мирчев“ за 500 денари од страна на мнозинството во Совет на Општина Велес според членот на советничката група на СДСМ, Мирјана Петрушева Савова неприфатливо е без да се направат сериозна јавна расправа и социјална анализа како и констатација дека „недостига чувство за реалната економска состојба во која се наоѓаат граѓаните“.

Во соопштението за јавност Петрушева Савова образложува зошто таа и советничката група на СДСМ не се сложи да поскапи престојот во градинка на децата во Велес:  

„Како советник во Општина Велес имам обврска и морална одговорност навремено и јасно да ја информирам јавноста за одлуките кои директно удираат по животниот стандард на граѓаните. За жал, повторно сме сведоци на уште едно поскапување кое најтешко ги погодува младите семејства и родителите.

Овој пат, мнозинството во Советот на Општина Велес донесе одлука за зголемување на надоместокот за престој на децата во ОЈУДГ „Димче Мирчев“ — од 1.490 денари на 1.990 денари. Тоа е зголемување од речиси 35%, без сериозна јавна расправа, без социјална анализа и без чувство за реалната економска состојба во која се наоѓаат граѓаните.

Ова не е изолиран случај. Напротив, станува збор за трето поскапување во рок од само еден месец. Претходно беше покачена цената на такси превозот, а потоа се промени и методологијата за утврдување на пазарната вредност на недвижниот имот, со што директно се зголемува данокот на имот за новите поднесители  каде цената за метар квадратен според која се пресметува данокот се пресметува од 120 евра за метар квадратен на 300 евра.  Сето ова укажува на јасен тренд: товарот на финансиските проблеми се префрла исклучиво врз грбот на граѓаните.

Со право се поставува прашањето — дали ваквите поскапувања беа дел од предизборната програма на мнозинството во Советот и на актуелниот градоначалник? Дали граѓаните гласаа за повисоки давачки, поскапи услуги и зголемени трошоци за основни животни потреби? Или, пак, повторно сме сведоци на класична пракса во која ветувањата завршуваат веднаш по изборите, а реалноста станува сè потешка за обичниот човек?

Дополнително, ваквите одлуки отвораат и пошироко, загрижувачко прашање — дали економијата во државата, но и локално, полека но сигурно влегува во надолен курс? Наместо мерки за олеснување на животот, гледаме низа одлуки кои создаваат дополнителен притисок врз семејните буџети, без јасна стратегија, без визија и без социјална чувствителност.

Граѓаните заслужуваат отчетност, транспарентност и политики во нивна корист, а не континуирани поскапувања кои го подриваат нивното достоинство и егзистенција.“

Советот на Општина Велес на денешната седма седница расправаше за покачувањето на цената на престојот на децата во градинка кое беше 17 точка на дневниот ред поточно по „Предлог – одлука за утврдување на износот на надоместокот на трошоците на децата во ОУЈДГ „Димче Мирчев“ кои паѓа на товар на родителите.

Убавка Јаневска