Петстотини новогодишни пакетчиња од општината за деца во Чашка

Петстотини деца, од претшколска возраст, за тие што ја посетуваат градинката „Бамби“, ученици од прво до трето одделение во трите општински основни училишта и во петте подрачни основни училишта како и дечиња со попречености во општината, деновиве, ги добиваат новогодишните пакетчиња.

На децата новогодишните пакетчиња им ги дели Дедо Мраз.

Градоначалникот Горан Стојановски рече дека станува збор за традиционална активност на општината која има за цел да внесе претпразнична новогодишна атмосфера во градинката, во училиштата, во Дневен центар за лица со попречености и секако во домовите на децата.

-Традицијата е востановена пред пет години. Општината оваа активност ја реализира со поддршка на бизнис заедницата за што посебно изразуваме благодарност. Сметаме дека на новогодишно пакетче се радува секое дете па затоа ја востановивме како практика. Тука е и најпосакуваниот дедо на светот, Дедо Мраз, кому децата можат да му ги соопштат новогодишните желби. Знаеме дека секое дете има новогодишна желба додека преку фотографиите со Дедо Мраз  се овековечува дел од детскиот живот и уште една, нивна, детска година. Ја користам оваа пригода да им посакам на сите деца здрава, радосна и среќна Нова 2023 година, рече Стојановски.

Градоначалникот исто така упати честитки за здрава,среќна и берикетна нова година до сите жители на Општина Чашка.

Убавка Јаневска