Семејството Шоповски бара државата да ги стави на позитивна листа лековите за црн дроб бидејки само тоа може да го спаси животот на нивниот син
Дваесет и две годишниот Славче Шоповски боледува од цироза на црн дроб. Тоа е редок вид на заболување за кое во Македонија може да се најде само еден лек. И токму тој, Зинкомин му создава компликации на овој велешанец, кај кого лекарите болеста ја откриле по една година откако го лекувале од депресија.
– Во Македонија ги нема лековите. Еден од лековите роднина ми го купуваше од Германија или од Грција, каде што чини 50 евра. Другиот лек треба да го купам од Данска или Холандија се вика Вилцин и чини 250 евра ,за едно пакување, а мене месечно ми требаат две дози. Неможам да го купам бидејќи немам пари па затоа користам негова замена се вика Цинкомин но ми создава проблеми со тромбоцитите кои паѓаат кога го пијам. Тој лек единстевно е на позитивна листа и чини 360 денари. Другите два лека не се увезуваат во Македонија па мора некому во Данска и Холандија да испратиме пари за да ми го купи или некоја аптека одовде да ми се нафати да го набави па јас да им го платам. Но немам пари, рече Славче.
Никој во семејството на Шоповски не работи. Неговиот татко останал сега а мајка му е неколку години без работа. Горан Шоповски вели дека се обидел да им објасни на Фондот за здравство, на Бирото за лекови и на министерството за здравство дека лековите за ова ретко заболување треба повторно да ги вратат на позитивна листа но не успеал во намерата.
– Откако го пребродивме шокот и свативме со каква сериозна болест треба да водиме битка јас во неколку наврати се обидов да остварам контакти со трите државни институции. Бев во Фондот и кога ги прашав за лековите што му ги препишаа на Славче тие рекоа дека не ги знаеле. Од таму ме пратија во Бирото за лекови а тие пак во министерството за здравство. Си ја префрлаа топката додека јас очајнички се обидував да им докажам дека се работи за животот на мојот син. Јас немам пари да ги купам а не сакам да го изгубам детето. Без работа сум и ќе прифатам сешто да работам само да дојдам до пари кои ќе можат да бидат доволни за да набавиме лекови, рече таткото на Славче.
Така мисли и мајка му Мица. И таа бара работа. Со солзи во очите праша нели треба државата на луѓето кои боледуваат од ретки болести да им помага и зошто тоа не го прави со нејзиното дете.
– Ако нема финансиска помош тогаш нека го вработат, нека му дадат работа која Славче ќе може да ја работи, еве и јас и татко му ќе прифатиме секаква работа само да се соберат тие 600 евра што месечно мораме да ги имаме за да му купиме лекови. За животот на моето дете се работи, рече Мица.
Шоповски јавно побараа од државата да ги врати на позитивна листа лековите за лекување на болеста цироза на црн дроб. Тоа за нив е единствена надеж да го спасат животот на нивниот дваесет и две годишен син./Д.С
ГРАЃАНИТЕ КОИ ЌЕ САКААТ ДА ПОМОГНАТ, СО ПАРИЧНА ПОМОШ, МОЖАТ ДА ЈА ИСКОРИСТАТ ТРАНСАКЦИСКАТА СМЕТКА НА ГОРАН ШОПОВСКИ
210 501647265398 – ТУТУНСКА БАНКА
МОБ.ТЕЛ 076 47 05 11
